أبين زين

يا رئيس حزب الإخوان.. رملك قدامى ملان.. فيه هيصة كتير.. فيه زيطة.. وكمان فيه يوم زوغان.. الرمل وودعى فى حيرة.. فيه أزمة يا سيدى كبيرة.. بتقول ما تفضوها سيرة.. خايفين من غدر زمان؟ طيب ما تساوى أمورك... وتقول للإخوة تشورك.. وبلاش تغرق فى بحورك.. د الإخوة طريقها ملان.. وكمان ما تقول لرئيسنا.. كتر الأزمات بيدوسنا.. وبلاش فى النار تحبسنا.. ونعيش فى الدوخة كمان.. مش انتو الحزب الحاكم.. وماسك فى السلطة وعاكم.. عامل فى الحلقة ملاكم.. ورينا بقى اللمعان.. الناس فى الحيرة يوماتى.. وأنا باكتم قوى بسكاتى.. عايشين فى الغلب ليلاتى.. والكل صبح قرفان.. مش قولتم فيه عهد جديد.. فيه هو؟ ما بلاش ترديد... فيه ناس ناوية تسيبكوا أكيد.. طول ما انتو فى حكاوى مثيرة.. وأنا بانصح والفنصح مرايا.. فيه ناس قاعدة تبص ورايا.. بتقول قول للإخوة كفاية.. ليه عاملين الثورة ضفيرة.. قاعدين مش عارفين على فين.. تمشوا فى وسط الناس تايهين.. مش ممكن تسكت ملايين.. وانتم ماسكين التباشيرة.. وبتعلنوا فيه عهد جديد.. بس ما فيش فيه شمع يقيد.. ويوماتى الأوجاع بتزيد.. والسلطة واخدينها أسيرة.. فكروا حبة فى حل مناسب.. أصل ما عدش فى إيدنا مكاسب.. والجماهير فيه يوم حتحاسب.. ما تقولشى ما تفضها سيرة.. باى باى باى.. وبلاش تكشيرة.