بخت مصر!

سنتك كبيسة ياريس.. كلها ألغام .. طب قول لي راح تعمل إيه.. وحتصحي كيف وتنام.. وسكتك فيها شوك بيزيد مع الأيام.. وناس كتير في الطريق.. واقفة وعاملة زحام.. وآخر السنة فيه مفاجأة.. هي إيه معرفش.. وحتي برجك كمان من ربكته ما نطقش .. طب قول لي راح تعمل إيه نجمك صحيح ما قفلش .. بس النهاية طريق يا صاحبي آخره ما بنش وآخرتها إيه ربنا يستر د ما تطمنش.. واللي حتوعدنا به راح تلتقيه ما حصلش .. تسألني طب تعمل إيه.. لأ لأ.. ما تسألش .. حتشوف زوابع كتيرة صعبة ما بترحمش .. وقول لي راح تعمل إيه.. نجمك قفل.. ما قفلش.. ربك يسهل د نجمك فيه كلام ما تقلش.
شاطر يا شاطر د نجمك قال ماهش شاطر.. وسكتك كلها مليانة بمخاطر.. فخلي بالك طريقك فيه شكوك ماطر.. واللي بتحلم به صيام كنت أو فاطر .. مسدود طريقه وعمره ما كان علي الخاطر.. ومهما فكرت أو دبرت في قناطر .. المركبة واقفة والريح والشراع ماكر.. وفيه وراك ناس كتير كاشفة اللي بتقوله.. وبكرة حتشوف كلامي بعرضه أو طوله.. وتقول بقي نجمي ليه حيحن لقفوله.. لكن في وسط السنة وآخرها حتلاقي .. موقف خطير ربما تختار في تحليله.. والنجم بيقول كلام ما أعرفش هو صحيح.. وللاحنسمع بشيء نختار في تأويله.
وجهك ملان هيصة جامدة وزحمة ياكتاتني.. خايف أقول لك حجات صعبة تبكتني.. فيه ناس كتير لو حأقول نجمك تسكتني .. وحأقول لك إيه وللا إيه لتقول حتربكني.. حواليك نفوس مش مريحة وساهية بكتني.. وبعد نص السنة حتقول مانيش فيها.. وفيه طرق من وراك نفسه ما يطفيها.. كان نفسه يبقي الزعيم.. وأنا فيها لأخفيها.. ومنكو فيكو حاجات ياكتاتني داريها.. وقول مش كده يا أخوانا مش معقول .. بكرة المشاكل حتكتر يبقي مين مسئول .. انت حتتعب كتير والنجم آخره قفول فخلي بالك بقي أصل الطريق حيطول.
لأ لأ بقي يا وديع نجمك بيتعبني .. وإللي باشوفه يا شيخ بالدهشة بيصبني.. كل إللي شايفه كده يا بديع مكركبني.. فخلي بالك بقي وبلاش تحاسبني.. النجم محتار معاك بيقول بيرعبني.. كل إللي عامله بديع من وعيي سالبني.. وخالي بالك في ناس متلونة وياك.. وناس كتير نفسها في لحظة ما تلقاك .. طب قول لي راح تعمل إيه.. فيه غول بيستناك.. ونفسه لو يوم تقع.. يفرح هنا وهناك.. وقبل آخر السنة .. وقبل آخر السنة فيه ناس حتجري وراك.. فخلي بالك قوي.. من إللي ماشي وراك.. حتصدقه.. يصدقك.. ابقي قابلني هناك.. برجك مخيف فيه حاجات.. باشوفها مش نفعاك.
نجمك يا سيد عصام بيقول بقيت عريان.. طب ما انت عريان ولكن بس فيه إخوان.. بيصدقوا كل حاجة تقولها يا غلبان .. لكن في نجمك حاجات بتحير الإنسان .. باسمع كلامك ساعات.. ألاقيه نغم وحنان.. وسعات في نجمك ألاقي كل ده دخان .. فخلي بالك بقي لما الحقيقة تبان.. حتشوف حاجات مستحيل تحلم بها في أمان.. وانت وحظك فكله م اللي فيه قرفان .. وبعد كام شهر يمكن تلقي فيها زوغان.. وناس كتير تكتشف كل إللي فيه سهران.. فيه ناس كتير نفسها ما تشوفش لك لمعان..علشان سيادتك محيرهم في كل مكان.. وانت كتير الكلام للشهرة واللمعان.. وإللي مالوش في الكلام يفضل كده عريان.
نجمك باشوفه كده.. بيقول عليك محمود وعيونه غزلان بتتحدث بلطف وجود.. وكل إخواته له شاهدين بطول العود.. بس إللي بيبرره دايما مالهش حدود.. والنجم بيقول حتسمع السنة دي ردود.. تقول لك إن الكلام ده .. فيه كل شيء مردود.. واللي انت بتمرره.. في بعضه مهش محمود والشمس حتغيب كتير طول م الكلام مفرود.. وفي سكتلك ناس بتفهم.. وأنت غاوي صدود.. فخلي بالك وحاسب الطريق مسدود.. وفيه حاجات متدارية وانت عارفها.. وفيه كمان مشكلة والنجم كاشفها... ومش حاقولها ويمكن بكرة أوصفها.. وحاجات كتير راح تبان وانت محرفها.
يا أحمد يا فهمي في نجمك حاجة منشورة .. بيقول ياريت والنبي تخلي فيه شوري.. وشاورنا في كل حاجة حتي في الكورة .. برجك ملان فيه حاجات مش ظاهرة في الصورة والشوري مطلوبة بس تكون ماهيش عورة.. حتي كمان مجلسك فيه خلق محشورة.. والنجم بيقول في شورتك ألف ميت شورة.. وبعد شهرين في ناس راح تلعب الكورة.. وتبقي شورتك في وسط الخلق اسطورة.. وحتعمل إيه وسطنا.. خليها مستورة .. ياه ياه.. في نجمك حاجات في السكة جاية كتير.. ومفيش فيه شورة وحتسمع إن فيه تغيير.. ومش حتفضل كده.. في لربنا تدبير.. وحأقول لك إيه وللا إيه.. الأمر جد عسير.
برجك طلع فيه حاجات يا هشام يا أبو قنديل.. مهما أقول وللا أعيد.. الشرح فيها طويل .. انت صحيح مستقيم وشريف وذوق وأصيل .. بس العمل فيه حتلقي شوك مالهش مثيل.. وناس كتير مش عاجبها القص والتفصيل .. وبيطمعوا في بسمتك.. ويقولوا ده تمثيل.. وأصل العمل في الوزارة شيء يهد الحيل.. وبكرة فيه مشكلات منفصلة تفصيل.. حتكركب الدنيا وانت مالكش في المواويل.. وبعد شهرين تلاتة حيبقي فيه تبديل.. فسيبها أحسن مافيش داعي بلاش تهليل.. وف سكتك ناس كتير واقفة بتوع تطبيل.. وانت بتاع ربنا.. ومالكش في التمثيل.. وحاجات كتير في الطريق مايشدها من الخيل.. وانت بتخدم في ناس.. انهد فيها الحيل.. ومش حتقدر تعبي للغلابةالكيل.. فقول سلامو عليكو وسيب.. قبل الحيطان ما تميل.
يا عمرو موسي في برجك حاجة شغلاني.. بتقول لي في سكتك ناس برضه تعباني.. وانت الخبير في السياسة.. وهم شيئ تاني.. وخلي بالك .. فيه شيء مورستاني.. بيجهزوه لحضرتك.. بطريقة إخواني .. وانت معارض وهم يا عمنا الجاني.. وحاقول لك إيه وللا إيه فيه حاجة شغلاني.. بيقول طريقك في أزمة عشان دستورنا بيعاني.. وانت كمان والبرادعي وأيمن نور وصباحي.. طول ما انتوا حاسين كدة يا موسي بجراحي.. برجك وبرج اللي وياك ملان من جرحه بنواحي..
والسيد البدوي برضه في برجكم صاحي.. بس إللي واقفين بعيد عنك بيتحدوك.. فخلي بالك عشان دول نفسهم يرموك.. انت وكل إللي وسط السكة بيعاونوك.. والأخوة من نفسهم دايما كدة يحاربوك.. انت وكل إللي ماشي معاك وبيساعدوك.. فشدوا حيلكم بقي إخوانكو حيزفوك.. بس في آخر الطريق علي راسنا راح نشلوك.