شلاليت

البورصة طالعة ونازلة كل يوم في نظام
قالوا الرصيد ارتفع والناس عليه في زحام
وفجأة قالوا انخفض في كل الأرقام
ولو سألت السبب تسمع كلام في كلام
مرة يقولوا الجنيه سبب ارتفاع السوق
ومرة تانية الدولار كان في البنوك مسروق
ومرة تالتة الحكومة دمها محروق
لأن سعر الجنيه نازل رخيص من فوق
ولو سألت الوزير يقول بلاش تشويش
الاقتصاد متزن والاستدانة ما فيش
والسوق رخيص بس محتاج مننا تفتيش
من الحكومة ومن تموين وشرطة وجيش
مش محتاجين كل حبة تقولوا كان أو كان
خلاص بقى بطلوا تطبيل ورقص زمان
إحنا مسكنا البلد وإيدينا فيها ميزان
وكل شيء عندنا معلوم لنا بإتقان
إيه رأيكم في الكلام الحلو من مسئول
عايش وشايف حياتنا عكس ما بيقول
وكأن كل اللي شايفه شيء مالوش مدلول
فيه حد عايز يقول تاني كلام معسول