عبد الحميد أفندى النادي، ناظر مدرسة الأخلاق الحميدة، مخاطبا هادى ابن خالته، وهو يحاول بكل ما أوتى من قوة السيطرة على أعصابه، وأن يكبح جماح غضبه المتقد: باقول لك يا هادي.. الناس ما فيش لبانة في بقهم دلوقتى غير حكاية ميمى مراتك.. وبقت سيرتها على كل لسان؛ مش معقول أبدًا البرود اللى انت فيه يا أخي.. الله ؟!! انت اللى بيجرى في عروقك دا إيه.. دم ولا مية ساقعة !! اتحرك واتنحرر شوية يا راجل انت.. ما يصحش كده؛ دا انت من عيلة النادي اللى تمللى بينضرب بيها المثل في الجدعنة والحمشنة؟! هادى النادي بكل تعقل: يعنى انت عايزنى أعمل لها إيه يا عبد الحميد أفندى يا ابن خالتى ؟! إنت عارف إنها متحررة شوية عشان كونها اتربت في بلاد بره، ومع ذلك فأنا واثق منها ومن أخلاقها، وإخلاصها مش محل شك أبدا بالنسبة لي؛ وإلا ما كنتش ارتطبت بيها إطلاقا، وللأسف الناس كده كده بتتكلم على بعضيها، وما بيسيبوش حد في حاله؛ ولو طاوعناهم بيوت كتير هاتنخرب وأهلها هايتشردوا، يبقى نحكم العقل أحسن... عبد الحميد أفندى وقد كاد برج من نافوخه أن يطير: يا جدع انت باقولك شافوها لما كانت في النادي وهى عماله تضحك مع بعض الشباب الرقيع وكانوا آخر حلاوة وانسجام، ومش كده وبس دى راحت معاهم ديسكو كمان والعياذ بالله، انت مستنى إيه أكتر من كده.. فوق يا هادى يا ابن خالتى قبل ما تقع الفاس في الراس.. ولا ساعة ندم، ثم إيه موضوع المغنى اللى هي طالعة فيه اليومين دول، إحنا حد في عيلتنا كلها على مدى التاريخ كان مغنواتى أو مشخصاتي، أو حاجة من الكلام الفارغ ده، والمصيبة إنك عارف وساكت ينفع الكلام ده برضه ؟!! هادى محاولا تجاوز الموضوع: قالت لى إنها هواية بتنفس بيها عن نفسها، مش أحسن ما أكتم على نفسها وتطق تموت أو تجيلها حالة نفسية، المهم إن في منتج كبير أعجب بصوتها وأنتج لها كليب ولسه متصلة بيا من شوية لأنها عند مامتها وقالت لى شوف الكليب الجديد بتاعى يا حبيبى على التليفزيون أنا باهديهولك مخصوص، تعال نتفرج عليه وسيبك من الأفكار السوداوية دى يا شيخ... يفتح هادى التلفاز ويتابع معه عبد الحميد أفندى كليب ميمى فؤاد الجديد على مضض والذي كان بعنوان "أنا كلى إخلاص يا حبيبي" وغنت فيه: أنا كلى إخلاص يا حبيبي وحبك عندى دا فوق الكل وبقلبى حبيت يا حياتي واخترتك من بين الكل سيبت أنا ميدو وسيبت أنا ميشو واخترتك من بين الكل واخترتك من بين الكل ما بقيتشى بسلم خالص ولا حتى في مره أطل غير لما أقابلهم صدفة طب قلى يا روحى الحل سيبت أنا ميدو وسيبت أنا ميشو واخترتك من بين الكل واخترتك من بين الكل إيه يعنى ضحكت لصاحبك وعاملته أنا زى الفل الغيرة تشعلل قلبك والغلّ في لحظة يطل سيبت أنا ميدو وسيبت أنا ميشو واخترتك من بين الكل واخترتك من بين الكل يا حبيبى دى غيرتك صعبة خلتنى يا روحى أمِلّ وفحبك شفت القسوة وفحبك دقت الذل سيبت أنا ميدو وسيبت أنا ميشو واخترتك من بين الكل واخترتك من بين الكل هادى النادي معاتبا عبد الحميد أفندى بعد انتهاء الكليب: مش قولت لك يا عبد الحميد أفندى البنت مظلومة، شوف عملالى كليب مخصوص إزاى عشان تثبت لى فيه مدى إخلاصها وحبها... عبد الحميد.. عبد الحميد... لم يرد عبد الحميد أفندى على ابن خالته فقد فاضت روحه إلى بارئها بعد منتصف الكليب عقب جلطة قلبية قوية من شدة الغيظ.
