بالصور.. «صفر» جديد في الثانوية العامة بالمنصورة.. أحمد الحبيبي يُفاجأ بحجب نتيجته على المواقع.. وكيل الوزارة للطالب: «إنت صعبان عليا ومش هأقدر أعملك حاجة».. وشقيقه: «حسبى الله ونعم الوكيل»

أثارت نتيجة الثانوية العامة 2016 غضب العديد من الطلاب، ولم يرض عنها الكثير منهم، ولكن الغريب في الأمر هو حصول بعض الطلاب على صفر، في كافة المواد التي امتحنوها.
كان الطالب أحمد الحبيبى، بمدرسة منية سمنود الثانوية المشتركة، من مدينة المنصورة، أحد أولئك الطلاب الذي فوجىء بحجب نتيجته على المواقع الإلكترونيه بأنها محجوبة، ولم يصدق ذلك فقرر الذهاب للمدرسة في صباح اليوم التالى ليتأكد من الشهادة الرسمية، ولكن كانت الدرجة بها هي "صفر"، ومختومة بختم المدرسة.
قلق وتوتر
يقول شادى الحبيبى، شقيق الطالب: "نتيجة أخويا أحمد في الثانوية العامة اللى ظهرت إمبارح صفر، والنتيجة دى بعد تعب سنة كاملة مذاكرة ودروس وبهدلة وتعب أعصاب، طول الليل بنحاول نجيبها من النت لكنها محجوبة اضطررنا نستنى المدرسة الصبح علشان نجيبها وسط قلق وتوتر مع إن المتوقع أن النتيجة أن شاء الله تكون حلوة ومرضية لينا".
«حالة عزا»
وأضاف شادى: "اللى حصل بالظبط أن لجنتين كاملتين واحدة علمى والتانية أدبى بنفس الصورة اللى موجودة دى ونفس الشهادة مع اختلاف الأسماء، 43 طالبا بأهلهم بإخواتهم عندهم حالة عزا والسبب صفر، محدش عارف فيه ليه أخدوا بعضهم وطلعوا على مبنى محافظة الدقهلية بالمنصورة، قابلهم وكيل الوزارة وبدون فايدة قالهم انتوا صعبانين عليا ومفيش ف أيدي حاجة اعملها!».
الغش الجماعي
وأوضح شادى أنهم توصلوا إلى أن السبب في تلك النتيجة هي أنه كان هناك غش جماعى وتم تحرير محاضر شغب وغش أثناء الامتحانات، مضيفا: «طب خلينا نقول إنه كان فيه غش جماعى والطلاب دى لازم تتحاسب، هل يعقل أن الغش الجماعى للمواد كلها العلمى والأدبى، هل الغش كان في كل الامتحانات بالطريقة دى علشان يطلع كل امتحان لاغى، هل كل طلاب اللجنتين غشوا في نفس المستوى بالطريقة دى، طب ليه فيه واحد بس في وسط لجنة الأدبى ناجح! وليه محدش بلغ ال43 طالب إن اتعملهم محاضر ده لو اتعمل محاضر أساسا محدش عارف حاجه محدش فاهم ولا حد بيجاوبنا حتى مداخلة قناة الحياة محدش مسئول من الوزارة عاوز يرد عليهم!!! حسبى الله ونعم الوكيل لما سنة كاملة تضيع كده بسبب اننا منعرفش حتى السبب».