(إفطار بطعم العامية)..غش تجيب مجموع

هل علينا رمضان شهر الرحمة والبركات بس يا خسارة جت معاه الامتحانات، هنغش إزاى ونحل إزاي؟! أه يانى يا صيامى ياللى هيضيع! .
امتحانات الثانوية العامة دى فكرتنى بذكريات أليمة ورجعتنى ل 8 سنين ورا .. أيام امتحاناتى فى الثانوية العامة بقلقها وتوترها وبابا غنوجها وسلطاتها وتعب الأعصاب اللى احنا كنا عايشين فيه ..
الثانوية العامة اللى لسه بحلم بكوابيسها لحد دلوقتى .. آه والله زى ما بقولك كده.. أصلى أنا بقى من يومى وأنا محظوظة ومكان امتحانى كان فى أول اللجنة عند الباب يعنى أكتر مكان فى المدرسة كلها كنت بحس انه ملتقى المدرسين والمراقبين وكنت أول ما أفكر أغش ألاقى المدراسه كلها فوق دماغى تقولوش حد مبلغ عني، أهى أيام وراحت لحالها .
بس اللى بستغرب منه الأيام دى بقيت أسمع "يارب اللجنة تكون سهلة " هما غيروها ولا إيه؟ كانت على أيامنا " يارب الامتحان يكون سهل "عجبت لك يا زمن!
لا والأغرب دلوقتى بقيت أهم الأسئلة المتداولة على ألسنة الأهالى لأبنائهم: كان فى غش ولاّ المراقبين سدوها فى وشكم؟ .. روح يا شيخ إلاهى يفتحها فى وشك سبع غرز.
ومن ناحية تانية بقى لو جينا نتكلم عن أجدد طرق الغش فمفيش أكتر منها وأسرعها وأنجزها هو " عمنا الموبايل " بس تقول إيه عن المنحوس إللى يوم ما يقرر يغش ويسرب الامتحان حظه يوقع رقم جلوسه فى تسريبة وضاع الولد يا ولداه .
وبعيدا جدا عن كل اللى أحنا قولناه فوق ده أحب أقولكم " فوقوا ياأخونا متضيعوش صيامكم..أى نعم إللى بيغش بيجيب مجموع والتعاون حلو مفيش كلام.. بس خليها عليكم المرة دى علشان الصيام ميضعش .. ورمضان كريم وكل سنة وأنتم طيبين .