مصطفى النجار ل«المصريين»: «انتوا بتشربوا سموم من حنفيات المياه»

أطلق مصطفى النجار الناشط السياسي البرلماني السابق، عدة تحذيرات من تلوث مياه الشرب، التي تصل للمصريين عبر الصنبور دون وجود فلتر خاص للتنقية.
وأكد أنه عند تغيير فلتر المياه الخاص به وجد مادة سوداء مترسبة داخل الفلتر، تشبه ما يخرج من مياه الصرف الصحي.
وكتب النجار تدوينة على "فيس بوك" قائلا: "أنا مش عايز أضايقكم على الصبح أو أخوفكم، لكن دا موضوع متعلق بصحتنا وصحة عيالنا، أنا مش بثق في شركات المياه المعدنية في مصر، وبفضل استخدم فلتر في البيت بشوف أنه أضمن، بستخدم فلتر مياه يابانى وبغيره حسب الوقت اللى الشركة المصنعة محدداه، النهاردة كنت هغير الفلتر أو الجزء الداخلي فأخذنى الفضول أفتحه من جوا بعد ما فكيته، لقيت الترسيبات السوداء دى اللى بتشبه بدون مبالغة مية المجاري، الفلتر منع عني وعن أسرتى كل السموم دى ويا عالم إيه السموم اللى مقدرش يمنعها حسب إمكانياته".
وأضاف: "أنا مش متخيل إن المصريين بيشربوا كل السموم دى ومش عارف الدولة بتعمل أيه بالضبط، ودلوقتى بقيت متفهم ليه الفشل الكلوى والسرطان وأمراض تانية بقت مستوطنة في مصر".
وتابع النجار:"احنا بنشرب سموم بيور.. نصيحتى لكل رب أسرة مهما كان مستواه المادى أبوس إيدك اشتري فلتر لبيتك وعيالك، دا أقل حاجة تعملها للحفاظ على صحتكم، مش بقولك اشترى مية معدنية لإنى شخصيا مش واثق في شركات المياه المعدنية في مصر، وقبل كدا خليت واحد صاحبى متخصص فحص عينات مية معدنية من اللى موجودة في السوق واكتشف بلاوى، وأوعى تغرك الإعلانات وأسماء الشركات الكبيرة".
وقال: "أي فلتر هتشتريه مهما كانت إمكانياته ضعيفة وسعره قليل فهو بالتأكيد هيقلل التلوث اللى في المية اللى انت بتشربها انت وولادك، صحة عيلتك أولوية ولو حد متخصص في مجال تنقية المياه يرشح للناس أنواع مختلفة كويسة من فلاتر المياه سعرها يكون مناسب لكل الناس".
وطالب النجار المصريين بتوخي الحذر ومنع المرض فقال: "ولو عايز تعمل خير قبل ما تتبرع للمستشفيات امنع المرض من المنبع واشترى لأسرة فقيرة فلتر مياه، يبقى حمتهم نسبيا من المرض فلتر المياه مبقاش رفاهية في بلد حنفياتها بتنزل مية مجاري".