أول فيديو لصاحب صورة «امسك طالب ثانوية عامة».. سيف ناصر: صورة «فيتو» حقيقية مش فوتوشوب.. وادعاءات «فبركتها» سببه تعبيرها عن حالنا.. «حسيت بحسرة من بلد بيحارب طالب».. «إحنا في هدنة وانتظرونا بعد العيد»

كشف الطالب سيف ناصر، صاحب صورة «امسك طالب ثانوية عامة»، التي التقطها له الزميل محمد متعب أول أمس، التي يظهر فيها أثناء مطاردة أفراد الأمن له، كذب الإدعاءات التي نشرت على صفحة الشرطة المصرية، والتي تشير إلى أن الصورة «مفبركة».
أوضح أنهم بصدد اتخاذ العديد من الخطوات التصعيدية خلال الأيام القليلة المقبلة في حال عدم الاستجابة لمطالبهم، محملًا الدكتور الهلالي الشربيني وزير التربية والتعليم، مسئولية ما أسماه ب «المهزلة»، كاشفًا عن تفاصيل جديدة في ثورة طلاب الثانوية العامة ضد الوزارة، من خلال حواره ل «فيتو».
حقيقة الصورة
وأكد «ناصر»، أن الصورة التي التقطها الزميل محمد متعب «حقيقية»، وأن أفراد الكردون الأمني الذين ظهروا في الصورة هم الذين طاردوه، قائلًا: «الكردون الأمني اللي ظهر في الصورة أفراده هما اللي اتحركوا وجريوا ناحيتي».
مبينًا، أن «الصورة فرقت جدًا معايا ومع الناس.. خلت صوتنا يوصل لكل العالم، وأنا مش خايف من أي حاجة زي ما ناس كتير بتكلمني وبتحذرني وتقولي خد بالك من نفسك.. طول ما أنا على حق هفضل مش خايف من أي حاجة».
«مش فوتوشوب»
أشار إلى أن «وزارة الداخلية زي ما نزلت على الصفحة الرسمية بتاعتها إن الصورة دي فوتوشوب ممكن ننشرلها صورة واتنين وتلاتة وعشرة، تأكد إن الصورة دي حقيقية.. هي الفكرة إن الصورة دي عبرت عن حالة الطالب وبينت هو بيعاني من إيه»، متسائلًا: «يا ترى المرة اللي جاية هنقدر نرصد صور زي كده؟»، ويا ترى هيكون في كام محمد متعب في المجتمع عشان يعرف يرصد حاجة زي دي؟».
بلد بتحارب طالب
ووصف شعوره أثناء مطاردة أفراد الشرطة له، قائلا «حسيت بنقص شديد وحسرة.. إزاي البلد بتحارب طالب، أو إن هي بتقف ضد طلاب.. إحنا كنا مستنيين أي مسئول ييجي يتكلم معانا ويتبنى مواقفنا بس للأسف مالقيناش حد».
أكد، أنه كان يتحدث مع أفراد وزارة الداخلية ويحاول أن يوضح لهم أن مسيرتهم التي خرجوا فيها سلمية، ولكنهم لم يستمعوا لكلامه وبدءوا في مطاردته، قائلًا: «أنا كنت بتكلم معاهم وبقولهم ماينفعش اللي انتوا بتعملوه ده إحنا طلبة إحنا إخواتكم الصغيرين وأكبر واحد فينا مش معدي 20 سنة، وإحنا لا لينا علاقة بسياسة ولا لينا علاقة بأي حاجة.. كل اللي إحنا عايزينه إن مستقبلنا في البلد دي ما يضيعش».
أوضح، أنا كنت بتكلم مع أفراد وزارة الداخلية وأنا متضايق جدًا، مشيرًا إلى أنهم كانوا محتجزين بنات جوه، وبيتم الاعتداء عليهن وأنا ما كنتش عارف أوصل لهن.
وعن إحساسه بالخوف أثناء مطاردة أفراد الشرطة له، أكد: «ما كنتش خايف نهائي والناس اللي بتقول إنه كان في عنيا خوف.. أحب أقولهم: "لأ ده بالعكس.. نظرة عنيا اللي كانت واضحة في الصورة ده حسرة على اللي أنا شايفه، ورد الفعل اللي صدمني من ناس أكيد عندهم طلبة وعندهم أولاد زيهم زينا فالمفروض أول ناس كانوا يساندونا ويحسوا بينا أفراد وزارة الداخلية".
مسيرة سلمية
أشار إلى أن زملاءه خرجوا في مسيرة سلمية للمطالبة بحقوقهم، قائلًا: «إحنا طلبة واقفين لا بنخرب منشأة ولا وقفنا طريق، ولا هتفنا بلفظ خارج.. يعني كانت مسيرتنا ماشية وفقًا لميثاق الاحترام والأدب».
مضيفًا، أنهم دعوا لتنظيم وقفة أمام وزارة التربية والتعليم، وحين ذهبوا إلى هناك ووجدوا قوات الشرطة منتشرة بكثافة انصرفوا من محيط الوزارة، موضحًا: «لما لقينا الداخلية قدام الوزارة احترمنا ده جدًا، وقلنا نروح نقف في مكان تاني بعيد عن وزارة التربية والتعليم، ومع ذلك الأمن طاردنا ولما كلمناهم وقلنالهم إحنا واقفين سلميين ومش معطلين أي شيء، مفيش حد سمعلنا واعتدوا علينا وضربونا وفرقونا بالقوة».
انهيار والدته
وكشف أن أحد زملائه أرسل له الصورة التي التقطها له الزميل محمد متعب، وبمجرد أن شاهدتها والدته انهارت في البكاء بسبب خوفها من إلقاء القبض عليه، موضحا: «أن أي خطر سيتعرض له سيكون سببه وزارة الداخلية».
وتابع: «أقنعت والدتي إني صح، وإني مش نازل أخرب ولا أطالب بأي حاجة سياسية تهز نظام الدولة.. أنا طالب بتظلم في الامتحانات والتنسيق ونازل عايز حقي، وطلبت منها تقف جنبي وتدعمني.. بس هي قالتلي مش هقدر أدعمك ولا أقولك انزل طول ما أنا حاسة إنك بتتعرض للخطر بسبب وزارة الداخلية».
وعن وجود قائد لتظاهراتهم أكد: «مافيش قائد.. كل ما يتم اتخاذه من قرارات هو نتاج مناقشات ومشاورات بين الجميع، كل الطلبة اللي بينزلوا واحد، وما فيش قرار بيتاخد غير بموافقة الجميع».
رسالة ل «الشربيني»
ووجه «ناصر»، رسالة إلى الدكتور الهلالي الشربيني، وزير التربية والتعليم قال فيها: «إنت وعدت وماوفتش فمتنتظرش مننا إن إحنا نصدقك في أي حاجة».
موضحًا، أن «وزارة التربية والتعليم لو متأكدة إن هي هتقدر توفي بأي وعد.. كانت وفت بوعدها لما قالت إن الامتحانات مش هتتسرب تاني، والامتحانات لآخر مادة حتى الآن بتتسرب والدليل امتحان الدين اللي اتأجل بسبب إنه تسرب تاني».
أكد أنه تم القبض على عدد من زملائه أثناء فض وقفتهم بالأمس أمام وزارة التربية والتعليم، وجميعهم تم إخلاء سبيلهم على الفور باستثناء اثنين ما زالا قيد الحبس في انتظار عرضهم على النيابة العامة وهما الأخوان نصر وأحمد عماد.
وتساءل الطالب: «ليه زمايلنا يتقبض عليهم ويتعمل فيهم كده.. هما تهمتهم إيه؟، أنا عايز أفهم: طالب نازل بيطالب بحقه تهمته إيه؟، عايزينا نمشي وما نقفش وما نتظاهرش خدوا ناس مننا يقابلوا الوزير، وخلوه يورينا تنفيذ القرارات».
تسريب الامتحانات
أكد، أن السبب في تسريب أسئلة بعض المواد هي وزارة التربية والتعليم، قائلًا: «نماذج الإجابة بتتسرب من الوزارة نفسها، ودي مهزلة تخلينا نسأل: يا ترى السنة اللي جاية إيه اللي هيحصل؟».
وحول مطالب الطلاب بإلغاء نظام التنسيق عند الالتحاق بالجامعات واعتماد نظام القدرات، أوضح: «من يقول إن إلغاء نظام التنسيق بالجامعات واعتماد نظام القدرات سيفتح باب الرشوة والمحسوبية، فأود أن أقول له إن هذا شيء يؤكد فشل وزارة التربية والتعليم ويثبت عدم قدرتها على إدارة نظام كهذا».
أضاف: «إحنا ما بنعملش العجب في مصر، لأن كل دول العالم ماشية بنظام القدرات، والتنسيق في مصر ما بقاش مقياس للعدل نظرًا للمهازل التي تحدث فيه».
خطوات تصعيدية
قال إنهم بصدد اتخاذ العديد من الخطوات التصعيدية في حالة عدم الاستجابة لمطالبهم، قائلًا: «لو مطالبنا ما اتنفذتش إحنا هنصعد وهندخل في اعتصام مفتوح أمام مجلس الوزراء تحت شعار: تصحيح مسار التعليم المصري».
أضاف: «هدفنا إصلاح مسار التعليم المصري.. التعليم في مصر ما يسرش أي حد، لأن الحاجات اللي بندرسها ما بتتناسبش مع سوق العمل»، مشيرًا إلى أن «أهم مطالبنا إيقاف المهزلة اللي بتحصل.. خلاص إحنا اتظلمنا، ودي دفعة الظلم لأنها أكتر دفعة فيها ناس اتظلمت فعلًا».
وعن اعتبار ثبوت تسريب أسئلة بعض المواد، سندا قانونيا يتيح لوزارة التربية والتعليم إعادة الامتحانات، أوضح: «إحنا مش ذنبنا.. إحنا ما بنصدق نخلص امتحان لأنه بيبقى زي هم وانزاح من على صدورنا عشان نخلص من تعب 12 سنة تعليم مالهومش أي لزمة».
تجديد التظاهرات
مؤكدًا، أنهم ينوون تجديد تظاهراتهم بعد ال5 من يوليو القادم، قائلًا: «إحنا حاليًا في هدنة عشان البلد»، موضحًا: «ما فيش أي مطالب لينا إتنفذت، وما فيش أي مسئول إتفاوض معانا، وعشان كده إحنا بنصر على نزولنا الشارع تاني.. بس إحنا حاليًا في هدنة عشان البلد والنهارده احتفالية ثورة 30 يونيو، وقبل يوم 5 هيتم تحديد يوم وهننزل فيه».
موجهًا رسالة للصحفيين طالبهم فيها أن يكونوا أكثر جرأة وأن يعملوا على توصيل صوت جميع المصريين، قائلًا: «عايز أقول للصحفيين خدوا محمد متعب قدوة ليكم».