طلاب ثانوية 2016 وحدهم ضحية التسريبات

ما بين أزمات نفسية وأمراض جسدية ودفع أموال للدروس عانى منها طلاب الثانوية خلال عامين لتحقيق حلم طال انتظاره بالالتحاق بكليات تعوض أسرهم عن 16 سنة تعليم، ضاعت أحلام هؤلاء الطلاب، وأصبحت كالسراب بعد تسريبات الامتحانات المستمرة، وسط انشغال الجميع بمن سرب الامتحان ومن وصل إليه التسريب وتقاذف الاتهامات، ولم يفكر أحد في مصير الطلاب؛ بسبب عمليات الغش التي تعصف بمجهودهم.
بعض الطلاب أصابتهم حالات اليأس، ورفضوا استكمال الامتحانات؛ لأنهم يرون أن الجميع سوف يتساوى في النهاية، والبعض الآخر طالب بإقالة الوزير، وذهب آخرون إلى المطالبة بعمل وقفة احتجاجية أمام وزارة التربية والتعليم لإلغاء التنسيق ومحاسبة من تسببوا في تسريب الامتحانات.
بلغة بسيطة تحدثت منة محمد طالبة بالثانوية العامة، عن المعاناة طوال العام وصدمة تسريب الامتحانات، قائلة "ما هو مش علشان كام واحد ما ذاكروش ولا حتى شالوا المسؤولية من أول السنة أو حسوا بالفلوس اللي كانت بتتدفع ولا تعب أهلنا معانا ولا حرقة الأعصاب اللي الواحد بيبقى فيها أو سهر الليل اللي شفناه، ييجي بكل سهولة الامتحان يتسرب ليه؟ ويتساوي اللي كان طالع عينه هو وأهله باللي كان بيلعب طول السنة؟ هي دي بلد العدل والمساواة؟"، وتابعت "لما يكون واحد جايب 93% وناقص كام من كسور علشان يدخل هندسة، ويضطر الأهل تاني يدفعوا فلوس لكليات خاصة، ويتخرج علشان يقولوا إحنا مش معترفين بيها".
وأضافت"لو فعلًا هنطبق إلغاء التنسيق واختبار القدرات إحنا اللي هنتظلم. لو حد نفسه يبقى مهندس أو حتى دكتور مش هيدخل الكلية يقولوا له ارسم مستطيل أو حتى مثلث، ويقولوا له أنت ممتاز ادخل الكلية مبرووك، ولا حتى دكتور هيقولوا له حل المعادلة. الموضوع مش بالسهولة دي. إحنا نافعين في منهج تربية وتعليم زي اللي بندرسه علشان نمشي في اختبار قدرات؟".
وقال علاء سمير طالب بالثانوية "أنا كنت مذاكر وداخل الامتحان زي أي حد، لكن بعد ما شفت من 3 أيام تخصيص لجنة امتحان ثانوية عامة بأسيوط؛ لتسهيل الغش الجماعي لأبناء مسؤولين بقرار من وزير التربية والتعليم، ما كملتش امتحانات، ومش ناوي؛ لأنهم في النهاية هيتم مساواتهم باللي ذاكر، بل ممكن يكونوا من الأول واحنا من الفشلة".
وأضاف سمير "النهارده رئيس اللجنة دي خرج وفضح كدب الخدعة اللي مسمينها التعليم المصري، واعتذر عن رئاسة اللجنة، وقال بكل شجاعة إنه لا يستطيع وقف الغش داخل اللجنة بسبب ضغوط أولياء الأمور ونفوذهم".
وتابع "قبل ما تقبضوا على مدير صفحة شاومينج، اقبضوا على وزير التعليم اللي سهل الفساد، واقبضوا على المسؤولين اللي خصصوا لجنة لولادهم، ولو عندكم شرف الغوا الامتحانات، واطلعوا اعتذروا".
أنور على فهمي الطالب بالثانوية العامة قال "أنا فعلًا ما ذاكرتش السنة دي ولا السنة اللي فاتت. باعترف والله وكل معلوماتي من الدروس بسيطة، بس إيه اللي ما خلنيش أذاكر؟ عشان عارف إن أنا آخري هاكون في قهوة، حتي لو دخلت حقوق أو طب؛ لأن كلهم واحد، يعني لما أشوف واحد مخلص هندسة وشغال في قهوة حاجة تقهر ولا لأ؟ علشان نظام التعليم الفاشل اللي بيكرهنا في التعليم كل يوم عن التاني بالمناهج اللي هي عايزة أينشتاين يحفظها ويفهمها والمدرسين اللي كانوا بيقولوا تعالى خد دروس عندنا، وإلا مش هتنجح. ياريت يحطوا مناهج سهلة في حدود المدرس المصري عشان كله بيفتي في المناهج، وبيتكلم على مزاجه".
وعلى صفحات مواقع التواصل دعا الطلاب لتدشين وقفة في 13 يونيو القادم أمام وزارة التربية والتعليم؛ لإقالة الوزير وإلغاء نظام التنسيق، ومعاقبة كل من تسبب فى تسريب امتحانات الثانوية العامة، وإلغاء قرار ال 10 درجات الذى تم تجميده للعام المقبل.
وجاء البيان بعد أن أطلق عليه الطلاب بأنه رقم"1″ ونصه "نحن طلاب جمهورية مصر العربية وبالأخص طلاب الصف الثالث الثانوى العام، قررنا جميعًا النزول يوم الاثنين الموافق 13يونيو المقبل بجميع أنحاء الجمهورية؛ للمطالبة بأربعة أشياء: إقالة وزير التربية والتعليم د. الهلالى الشربينى، إلغاء نظام التنسيق، معاقبة كل من تسبب فى تسريب امتحانات الثانوية العامة، وإلغاء قرار ال 10 درجات الذى تم تجميده للعام القادم".
وسوف يتجمع الطلاب أمام وزارة التربية والتعليم في التاسعة صباحًا، وفي الإسكندرية سيتجمعون عند بيرم التونسي بالشاطبي، ثم يتوجهون إلى مكتبة الإسكندرية فى تمام الساعة 9 صباحا، وفي الزقازيق سيتجمعون أمام مبنى المحافظة فى نفس التوقيت، أما عن باقى المحافظات فسوف يكون هناك تنسيق للأماكن أو الإعلان عنها فى وقتها.