«كلاكيت تاني مرة».. مصر وغانا في تصفيات المونديال.. رنا: «لسة الستة معلمين».. باسم: فرصة للانتقام.. ميدو: «بلاش تعشموا نفسكوا».. رحمة: «مش هترحمنا».. عمر: «مجموعة سهلة».. وندى: «الزهر هيلعب ولا إيه»

أطلق محبو الساحرة المستديرة على موقع التواصل الاجتماعى «تويتر»، اليوم الجمعة، هاشتاجا جديدا بعنوان «حلم المونديال»، تصدر أكثر الموضوعات تداولا عبر الموقع، وتفاعل معه الكثير من المغردين تزامنا مع إجراء قرعة التصفيات الأفريقية المؤهلة لنهائيات كأس العالم للكبار التي تقام في 2018 بروسيا، ورصدت «فيتو» بعض التعليقات التي كان أغلبها عن وقوع مصر وغانا في مجموعة واحدة للمرة الثانية على التوالى.
«هنوصل»
وقال عمر مجدى: «مجموعة مصر سهلة نقدر نطلع ب 14 نقطة، إذا احترمنا أوغندا والكونغو ونقدر نتعادل مع غانا هناك ونفوز هنا»، وغرد محمود عبدالعزيز: «إن شاء الله هنوصل منتخب مصر رجالة ميفرقش معاهم حد»، وأضاف: «والله ياجدعان أنا شايف أن لو اللاعيبة بتوعنا لعبوا برجولة وعملوا اللى عليهم واستموتم في الملعب ممكن نعدى والباقي على ربنا».
وغردت رحمة سعيد: «لسه بنفرح في الجزائر علشان مجموعة الموت اللي وقعت فيها، وقعنا إحنا في غانا اللي مش هترحمنا»، وأضاف ميدو: «نصيحه مني بلاش تعشموا نفسكوا بالمونديال علشان كالعادة هناخد على قفانا زي كل مرة»، وأضافت ندى محمد: «الزهر هيلعب ولا ايه المرة دى يا رجالة».
«أوعى نشيل 6»
وأعرب محمد حسن عن تخوفه من تكرار فضيحة كوماسى التي ودع المنتخب الوطنى بعدها تصفيات كأس العالم السابق قائلا: «أوعى نشيل 6 تانى»، وأضاف حسنى: «يعنى تونس تاخد التصنيف بتاعنا.. وتاخد المنتخبات اللى كنا منمرين عليها كمان! لا كتير يا تونس».
وقالت رنا يوسف: «غانا تاني هو مفيش غيرنا ولا ايه ده لسة الستة معلمين»، وأضاف أحمد عاطف ساخرا: «وقعنا مع غانا عندما تعطيك كورة القدم فرصة للانتقام»، وأضافت هند ساخرة: «يلآ علشان اللي ملحقوش يجيبوا فينآ أجوان المرة اللي فآتت يجيبو براحتهم المرة دي».
فرصة للانتقام
وقال محمد فتحى: «القرعة كانت ماشية زي الفل حاجة زي السكينة في الحلاوة ومستنين السنغال وبنقول هييييية هوب دبل كيك لقينا غانا»، وأضاف باسم سعد: «دائما ما تعطيك كره القدم فرصه للانتقام بس احنا مش هننتقم ومش هنصعد»، وتابع سعد عربى: «هي غانا صعبة اوي ياعماد.. كرة القدم دائما ما تعطيك فرصة للأنتقام يا جدع».
وكانت قرعة المرحلة الثالثة والنهائية لأفريقيا المؤهلة لمونديال كأس العالم 2018 بروسيا أسفرت عن وقوع منتخب مصر في المجموعة الخامسة برفقة منتخبات غانا وأوغندا والكونغو.