مولد الست نورا !

حودة سلامة: الحكاية بكل بساطة إن الست نورا دي أصلا من حارتنا وأبوها كان حتة حلاق غلبان اسمه عم مهدي، بس اسمها نورا وهي نورا تبارك الخلاق فيما خلق، وكانت مشاغلة كل شباب الحتة والحتت والشوارع اللي جنبيها وكلهم حبوها من كل قلبهم بس من غير أمل زي حالاتي كده، وهي كانت متبغدده ع الكل ومش عاجبها ولا واحد فيهم، لحد ما في يوم ما طلعتلوش شمس أدهم بيه رجل الأعمال الكبير اتجوزها؛ وبعد شهر العسل اللي قضوه في أوروبا، قام كل شباب الحتة اللي بيموتوا في دباديبها هجوا كلهم على فيلتها في التجمع الخامس وعملوا ورديات ليل ونهار لأجل ما ينولوا منها نظرة، قام جوزها الراجل الطيب قالك نورا دي ست وطنية ومجمعة الشباب في الخير، فقام عامل يوم في السنة مسميه مهرجان الست نورا وهو نفس اليوم اللي إحنا مسميينه مولد الست نورا، وكتر خيره بيقوم بكل مصاريف اليوم ده من أكل وشرب، هاقول إيه ولا إيه اسمع القصيدة دي وانت تعرف كل الحكاية:
بحب من غير الأمل
قولو لي بس إيه العمل
إيه العمل.. إيه العمل
أنا ما أعرفشي ؟!!
دا الخصر نحيل
والخد أسيل
وإكمنه جميل
طالع فيها...
سهرني الليل
أنا أقول موواويل
صبحني عليل
رمش عينيها
ولا حد قال إيه العمل ؟!
والحب كان من غير أمل
إيه العمل... إيه العمل
أنا ما أعرفشي ؟!!
يا سلام...
لو مرة أنول
وكنت أطول
وعنية تقول
حبّيته
دا أنا كنت أصول
عليه وأجول
لحد ما
هاخرب بيته
دا عذابي نار
لا تحتمل
والحب كان
من غير أمل
إيه العمل... إيه العمل
أنا ما أعرفشي ؟!!
دا كل مين
بعته ليك
يترجّى
ترحم حالي
فتنته بيك
بلون عنيك
صبّحته
من عزّالي
دا كام قتيل
رمشك قتل
والحب كان
من غير أمل
إيه العمل... إيه العمل
أنا ما أعرفشي ؟!!
عملنا يوم
من كل عام
نتلم فيه
أنا وأحبابه
والكل فيه
يدعي عليه
إنه يدوق
مره عذابه
ولافيش دعا
منا انقبل
والحب كان
من غير أمل
إيه العمل... إيه العمل
أنا ما أعرفشي؟!!