رضوى إبراهيم تكتب.. يوميات بنت في بيت أهلها

العادات والتقاليد مين اللي عمال يشوهها!
طيب ليه كل جيل بيطلع تايه أكتر من اللي قبله!
عمالين نتكلم في انفتاح وكلام عن حرية المرأة.. وفعلا المرأة أخدت حقوقها بشكل مبالغ فيه لحد ما قدرت.. لكن رغم كدة لسة مقضينها تناقضات وخوف من شبح العنوسة أو بمعنى أصح ضل الحيطة أحسن من ضل الراجل!
مين اللي وصل البنت لكده؟!
يا إما هتموت على الجواز وحاسة أن القطر فاتها... يا إما تعيش في دور المستبيعة وتقول وهما الرجالة هيعملوا إيه يعني.. جتهم نيلة لا بيحلوا ولا بيربطوا.. دا ضل الحيطة أحسن وأضمن ألف مرة من ضل الراجل.
ليه مصممين نقول إن في حالة اسمها بنت عانس.. مش بنت لسة مجاش نصيبها!
ومين اللي رسخ فكرة إن الراجل ملهوش أي تلاتين لازمة!
طيب مين قال أصلا إن الراجل حيطة!
من قديم الأذل.. عمالين نرسخ في الأجيال كلام كتير زي مثلا..
* الراجل زي الكلب وديل الكلب عمره ما يتعدل!
* بنتي عنست.. ولازم أوافق على أي حد والسلام حتى لو مش مناسب المهم إني أنقذ بنتي من شبح العنوسة!
* متفكروش يا بنات أن الجواز راحة!
* لازم أشتغل علشان مفيش راجل يتحكم فيا!
الأجيال بيتحفر فيها الكلام ده لحد ما طلعنا معظم البنات متخبطة
نوعية بنات مكسورة من نظرة المجتمع ليها!
نوعية بنات حاقدة على كل حد مستقر ومرتبط!
نوعية بنات متعقدة من الجواز بسبب أب رسم في دماغها صورة الراجل الغلط وأم كرهت الرجالة!
نوعية بنات بتجري ورا أي راجل حتى لو متجوز علشان تتجوز.. ويا عالم الراجل في الآخر بيتجوزها ولا بيضحك عليها!
نوعية بنات لما ترتبط عايزة بكل الطرق هي اللي تسيطر كأنها دخلة خناقة!
بس للأسف النوعيات دي من البنات بتوصل لكدة بسبب العادات والتقاليد اللي بدورها بتأثر على الراجل كمان وبتخلي نوعية منهم بتفكر كدة..
* يا عمي البنت دي للتفريح!
* أنت اتجننت تتجوز واحدة مشيت معاها!
* يا عم جواز إيه وبتاع إيه هو في أحلى من السنجلة!
* أنا عايز عروسة غنية... بنت ناس أوي... مش واحدة على قدها!
* أنا عايز واحدة بتشتغل تتحمل على الأقل مصاريفها وجزء من مصروف البيت!
* عايز أتجوز واحدة أجنبية علشان البنات العربيات كسر.. أجنبية تدلعني – واخد الجنسية!
* عايز بنت بيضة وعيونها ملونة!
طيب والنبي ده كلام!
عمنا فرويد قال إن 80 في المية من شخصية الإنسان بتتكون من سن ال5 إلى سن 9 تقريبا.
طب فيها إيه لو نحاول نركز على السن ده ونطلع جيل سوى شوية.
نرسخ فيه أسس صح زى..
* الراجل مش ضل... لأ الراجل ضهر وسند.. ساعتها هتلاقي الراجل حس بالمسئولية والست حست أن الراجل أمان!
* مافيش حاجة اسمها العنوسة والبنت كبرت وإن النصيب لما يجي محدش بيقدر يوقفه!
* المادة مهمة علشان الحياة تستمر لكن مش اللي معاه المادة هو اللي يسيطر!
* العلاقة بين الراجل والست مبنية على الاحترام.. مش على مين اللي يدبح القطة ومين اللي يشرب دمها!
* الراجل مش أنه يكون دنجوان وفي نفس ذات اللحظة جبان في المواجهة.. الدكورة على قفا من يشيل بس الراجل اللي بجد هو اللي ميبقاش الجنس والبنات هما مصدر اللذة الوحيدة ليه... ساعتها البنت هتثق في الراجل والحياة هتكون هادية!
* إن البيت يبقى في المرتبة الأولى بالنسبة للراجل والست، وبعد كدة الأصحاب والخروجات!
* الفرحة أساس.. مينفعش تبقى حياتنا كلها مشكلات ونكد ولازم كل واحد يعدي للتاني علشان الحياه تمشي!
* المركب مينفعش يكون فيها غير ريس واحد.. هو الراجل.. بس دوره لا يقل أهمية عن الست.. وإنها مخلوقة من ضلعه فلازم يكون مسئولا عنها مش علشان هو الريس يستقوى عليها!
* لما تيجي تختاري شريك حياتك.. اختاري الراجل اللي بجد مش دكر وخلاص
- اختاري اللي يراعي ربنا فيكي
- اللي يخاف عليكي
- اللي يغير عليكي مش يغير منك
- اللي يكون سندا وأمانا
- اللي يحب يشوفك ناجحة وفرحانة
- اللي ميحاولش يطفيكي
- اللي يخلي حياتكم مبنية على قراركم
- اللي يخلي سعادتك هدفه
- اللي يكملك مش اللي يكمل عليكي
مش تختاري أي راجل والسلام
في آخر الفضفضاية عايزة أقول إن المجتمع باظ بسبب التربية اللي مش مبنية على الوعي... تخيلوا الأجيال اللي عمالين نشيل ذنبهم..