أديب ل«السيسي»: «حل مشكلة الشرطة علشان الظلم بيوقع أي نظام»

قال الإعلامي عمرو أديب: "إحنا عندنا مشكلة خطيرة.. بعد 25 يناير الناس ابتدت تقول لازم نشوف حل لممارسات الداخلية.. ومحدش كان فاضي يتعامل مع هذا الجهاز بأي طريقة".
وأضاف "أديب"، خلال تقديمه برنامج «القاهرة اليوم»، المذاع عبر فضائية «اليوم»: "واقعة الدرب الأحمر دي افترا، ولازم نواجهها عشان نوصل لحل، ومش عايز حد يقولّي دي حالة فردية.. لكن إحنا في مشكلة حقيقية.. الناس دي عمالة تتحرش بالستات وبيقتلوا في الناس.. واللي حصل في الخصوص برضه مش ناسيينه".
وتابع: "السيسي قال هنطلَّع تشريعات عشان نحجِّم الافترا بتاع أمناء الشرطة.. ونحل مشكلة جهاز الشرطة.. وخلّي بالك، الافترا هو اللي بيوقَّع الأنظمة، وبيقولوا هو أكيد هيجيبلنا حقنا، لكن أنا بس عايز أقولك معلومة، كل ما تحصل مصيبة بيبلعوها، ويقولوا نستحمل، لكن البلع ده مش هيستمر كتير".
وأضاف: "مش هنتكلم على إنجازات الشرطة، ويا ريت نسيب إنجازاتهم على جنب؛ لأن ده واجبهم أصلًا".