نظرية "الحمار"..!!

في كثير من الأحيان أشعر أن المفعوص أبو نص لسان له أراء سديدة، وعنده رؤية تحليلية، وقدرة غريبة على ربط كلام المسئولين بمواقف من التاريخ.. ولذلك، من وقت لآخر آخذ رأيه فى تصريحات الرئيس، ورئيس الوزراء، وكبار رجال الحكومة..
ومنذ يومين تقريباً كنت أتابع بيان الدكتور هشام قنديل، رئيس مجلس الوزراء، أمام الرئيس محمد مرسى بالقصر الجمهوري.. وتعهد فيه "قنديل" بأن يصل معدل النمو فى مصر سنة 2022 إلى مثل ما كان عليه فى حكومة ما قبل الثورة.. وفجأة وجدت "أبو نص لسان" مستلقياً على قفاه من الضحك.. وبيضرب كفا بكف، وهو يردد : "من "قنديل" ل"مرسى" يا قلبى لا تحزن".. فسألته:
- إيه اللى بيضحكك كده.. وقصدك إيه بالعبارة دى؟
- أبدا يا بابا.. بث "قنديل" عارف إنه مش هيعمر فى الوزارة.. ومتأكد إن مفيش حد هيحاثبه.. وعشان كده ب"يفشر" براحته.. وكمان "مرثى" حاثث إنه مش هيطول فى الرئاثة، وعشان كده ه"يطنش" على اللى جه فى بيان الحكومة.
- هو ده بقى اللى مخليك مسخسخ على نفسك من الضحك؟!
- لا يا بابا.. مش هو ده الثبب بث.. كمان لأن "قنديل" و"مرثى" فكرونى بنظرية "الحمار"!
- الحمار!.. يعنى إيه؟
- دى النظرية اللى كان "جحا" دايما بيراهن عليها.. وعمرها ما خيّبت معاه أبدا.
- وبتقول إيه النظرية دى؟
- بث يا ثيدى.. فى زمن عمنا "جحا"، قامت "ثورة".. ولكن الثورة دى جابت أمير مخه "لاثع" وحب يعلم الحمار بتاعه القراءة والكتابة.. على أثاث إن "النهضة" الشاملة بتبدأ من الحمير!
- وعمل إيه الأمير ده؟
- جمع كل العلما.. وقاللهم إنى أنا عملت ميزانية 100ألف دينار لتعليم "الحمار" القراءة والكتابة.. واللى هينجح فى تعليمه هتكون له جايزة كبيرة..
- الأمير ده كان مجنون ولّا إيه.. دا مش ممكن أبدا..
- ما هو عشان كده كل العُلما اعتذروا عن المهمة دى.. لكن عمنا "جحا" راح للأمير وقال له أنا موافق على تعليم "الحمار" بث بشرط آخد ميزانية ال100 ألف مقدما، ومتثألنيش عن تعليم "الحمار" إلا بعد 10 ثنين.. فوافق الأمير.. ولكنه قال ل"جحا" إذا فشلت فى المهمة "هقطع" رقبتك..
- وبعدين؟
- لما طلع حجا من عند الأمير.. لقى العُلما فى انتظاره.. واتهموه بالغباء.. وإنه بيرمى نفثه فى التهلكة.. لأنه مش ممكن هيعلم الحمار.. ولكن "جحا" رد عليهم وقاللهم.. أنا اشترطت على الأمير 10 ثنين.. وفى المدة دى أكيد هتحثل حاجة من التلاتة.. إما أن يموت الأمير.. أو أموت أنا.. أو يموت الحمار..!!
- هههههههه.. والله "جحا" عنده حق!!