طرد سفيرالمجرمين..!!

كنت أتابع ردود الأفعال المحلية والعربية والعالمية حول الاعتداء الإسرائيلي على قطاع غزة، وقرار الرئيس مرسى بسحب سفيرنا من تل أبيب.. وفى هذه الأثناء.. كان المفعوص أبو نص لسان "رايح جاى" أمام عينى.. وكأنه عليه "بيضة طائر النهضة.. ف"شخطت" فيه قائلا:
-ما تترزع فى مكان خلينى أركز..
-تركز فى إيه بالظبط؟!
-فى المصيبة اللى بتحصل فى "غزة".. و"السفالة" الإسرائيلية اللى ملهاش حدود..
-من حقها يا بابا..
-حقها!! "كَسْر حقك منك لها".. انت اتجننت ولّا فرحان ولّا شمتان فى اللى بيحصل لإخواتك فى قطاع غزة؟!
-مش قثدى يا بابا والله.. أنا اللى أقثده إن إثرائيل عندها القوة والثلاح اللى يخليها "تتنطط" على أى حد.. وتطلع فى الإعلام وتقول بكل بجاحة لأى حاكم عربى "اللى ليه شوق فى حاجة يعمله".
-لأ يا لِمِض.. الكلام ده كان زمان، قبل الربيع العربى..
-وحياتك ياحج.. لا ربيع ولا خريف.. ولا شتا ولا ثيف.. وتل أبيب مش هاممها أى حاكم عربى.. وأكبر دليل على كده إنها بتنشر العمليات القذرة اللى بتقوم بيها على الملأ.. وفى كل وثايل الإعلام عشان تغيظ كل "دكر" عربى يحاول يرفع عينه قدامها..!!
-الرئيس "مرسى" سحب سفيرنا من إسرائيل، وه"يطرد" سفير المجرمين.. و...
-متكملشى يا بابا والنبى.. الريث "مرثى" كالعادة بياخد قرارات انفعالية غير مدروثة.. ثحيح الكيان الثهيونى مش فارقة معاه القرارات دى.. لكن "مرثى" ممكن ياخد قرارات تودينا فى ثتين داهية!!
-زى إيه يعنى؟
-زى إعلان الحرب على "بنى ثهيون"!
-طيب ما هو ده قرار كويس.. وكلنا بنستناه من زمان..
-كويث آه.. لكن الحرب مش ثهلة يا بابا.. وإذا كنا لحد دلوقتى مش عارفين نتيجة العملية "نثر" فى ثيناء.. ومش عارفين نخلث من الإرهابيين فى رفح.. يبقى إزاى هنحارب إثرائيل؟!
-العنف لازم يترد عليه بالعنف.. والدم بالدم.. والبادى أظلم..
-ثحيح.. لكن المهم الرد فى التوقيت المناثب.. وتكون مثتعد للحرب.. وأكيد الظروف مش مناثبة دلوقتى.. عشان حدودنا مع ليبيا والثودان وفلثطين وإثرائيل مش متأمنة كويس.. وإثرائيل عارفة كده كويث.. وعارفه كمان إن "مرثى" ب"يثخن" بثرعة.. وبتحاول تثتفزه وبتجره للحرب فى الوقت ده.. عشان تنفذ المخططات بتاعتها.
-يعنى إيه.. نقعد حاطين إيدينا على خدنا.. ونلطم زى الولايا؟!
-لا يا بابا.. بث كمان مش كل قرار ياخده "مرثى" تلاقى "الجماعة" نازلة "تكبير" و"تهليل" وتأييد بالملايين.. وإحنا فى الآخر ممكن "نلبث" فى الحيط.. وبدل ما يموت عشرة من إخواننا فى "غزة" يموت آلاف "المثريين"..!!