موحد "القطرين"!!

فجأة،وعلى حين غرة،زى ما بيقولوا أهل اللغة،سألنى المفعوص أبو نص لسان، سؤالًا عويصًا، ذكرنى بأسئلة الثانوية العامة فى أوائل الثمانينات من القرن الماضى،وفى بداية عهد المخلوع أبو علاء، ربنا يفك سجنه..
- بابا.. إيه الثبب اللى وحّد "القطرين"؟!
- كويس يا مفعوص إنك سألتنى السؤال ده.. ومن الآخر مفيش حد عنده إجابة زى اللى عندى.. عشان أنا موسوعة فى التاريخ وأستاذ فى الحضارة..!
- ومال التاريخ والحضارة بثؤالى؟
- ماهو يا لِمِض "القطرين" اتوحدوا فى عهد الملك "مينا".
- هيا كمان فيها الملك "مينا"!.. ربنا يثتر.. يا بابا الملكية انتهت من زمان..
- سيبك من طُولة لسانك دى وخلينى أشرحلك بالتفصيل.
- اشرح يا بابا اشرح!
- الأول.. صل على النبى.
- عليه الثلاة والثلام.
- كان فيه واحد اسمه "مينا" لكن بيدلعوه فى منطقتهم ويقولوله يا "نارمر"، وهو اللى أسس الأسرة الفرعونية الأولى.
- ثلاة النبى أحثن.. إحنا وثلنا للفراعنة كمان.. أنا غلطان من الأول.. كمّل يا بابا.. وبعدين.
- "نارمر" ده كان واد "جِرِمْ".. وليه هيبة وكلمته مسموعة.. ويادوب لسه راجع من السفر،حصلت خناقة كبيرة خالص بين الناس اللى فى وجه بحرى مع الناس اللى فى الصعيد.. وكل ما حد ييجى يتصل بقسم الشرطة فى "طيبة" يلاقى الشبكة واقعة،والنمرة مابتجمعش،لحد ما مات فى الخناقة دى رجالة وشباب وعيال صغيرة كتييير خالص..!
- وبعدين يا حج!
- النسوان قعدت تصوت وتولول.. والأطفال تصرخ وتعيط.. لغاية ما عمنا "مينا" شخط فى الناس شخطة جامدة.. وقال لهم خلاص لازم تفضوا الخناقة وتتصالحوا.. وتبوسوا على راس بعض.. ثم أطلق هتافه الشهير وعبارته الخالدة: "البحاروة والصعايدة إيد واحدة".. فانطلقت الزغاريد، وانهمرت الدموع.. والرجالة ضربت 21 "بمبة" فى الهوا احتفالا بالصلح التاريخى.. ومن ساعتها "نارمر" بقى ملك على "الوشين" البحرى والقبلى، ولبسوه "الطربوش"، وقعّدوه على الكرسى، وفِضِل عليه لغاية ما مات.
- فِهمتْ بقى يا فصيح مين اللى وحّد "القطرين"؟
- يا بابا.. أنا كان قثدى اللى وحد "القطرين" وخلّاهم "يلزقوا" فى بعض على شريط الثكة الحديد فى الفيوم؟!
- إخص الله يكسفك.. تقصد الحادثة بتاعت "القطارين"، اللى حصلت اليومين اللى فاتوا فى عهد الفرعون "مرسى الأول"، ورئيس وزارئه "قنديل رع"..؟!
- أيوه ياحج.. هيا دى الحادثة اللى قثدى عليها..!
- لا يا بنى.. معرفش.. الكدب خيبة..!!
- أفادكم الله ياحج!