"مينا" و"مرسى"..!

بينما كنت مستغرقا فى متابعة المشاهد والأحداث التى وقعت بمحيط قصر الاتحادية الرئاسى، إذ فوجئت ب"أبو نص لسان" يتسلل تجاهى، كما تسلل الإخوان إلى المحكمة الدستورية ومجلس الدولة لمحاصرتهما.. وبادرنى قائلا:
- إيه الفرق بين "مينا" و"محمد مرثى"؟
- مرسى رئيسنا، وقاعد فى القصر الرئاسى.. و"مينا" من المعارضين إللى أنصار "مرسى" طحنوه من الضرب، لأنهم اعتبروه من البلطجية، وطلع فى الآخر مهندس إليكترونيات فى شركة دولية.
- أنا مش قثدى "مينا" ده.. قثدى الملك "مينا"؟
- آه فهمت.. الملك "مينا" ليه اسم دلع اللى هو "نارمر" والريس مرسى محدش دلعه.. "مينا" كان من الصعيد.. و"مرسى" من الشرقية.. "مينا" مكملشى تعليمه، ويا دوب كان بيفك الخط.. و"مرسى" كمل تعليمه وخد الدكتوراه.. "مينا" كان بيتكلم هيروغليفى بس.. لكن "مرسى" باسم الله ما شاء الله بيتكلم لغات.. عربى وإنجليزى وشويه "فرنساوى" على "صعيدى" على "منوفى"..
- إيه التأليف ده ياحج.. دا إنت لو فى امتحان أولى إعدادى هتثقط بالثلث..
-ليه بقى.. إجابة مقنعة دى ولا مش إجابة..؟!
-طبعا مش إجابة.. أنا إللى غلطان.. كنت فاكر إن حضرتك موثوعة فى التاريخ زى ما كنت دايما بتقوللى..
-وإيه إللى غير فكرتك دى بقى كفى الله الشر؟!
-أنا قثدى فرق جوهرى.. حاجة ظاهرة ومؤثرة.. والناث كلها ممكن تقارن بيها بين "مينا" و"مرثى"..
- حاجة إيه دى..؟
- أقوللك.. فى عهد "مينا" كان الوجه البحرى والقبلى متفرقين عن بعض، وبينهم خلافات لرب الثما، وكل وجه فيهم له "تاج" مختلف عن التانى.. لكن أول ما "مينا" مثك الحكم وحد الوجهين فى واحد.. و"عَزَمْ" الناث الكبيرة منهم فى "القَثْر" بتاعه فى التجمع الأول، وثالحهم على بعض.. أما "مرثى" بعد ما كان قدامه فرثة دهبية إنه يدخل التاريخ من أوثع أبوابه.. ويعمل زى ما عمل "مينا" ويُوحِد "المثريين" لقيناه بيفرّق الشعب.. بيقرب أهله وعشيرته وجماعته وحزبه.. ويبعد الباقى.. إللى فى ميدان "النهضة" وعند الجامعة حلوين.. وإللى فى ميدان "التحرير" مأجورين.. إللى عند المحكمة "الدثتورية" ثوار ومية مية.. وإللى ضده عند "الاتحادية" بلطجية وحرامية.. وبعد ما كنا "إيد واحدة" قِدِرْ يقطع الإيد ويخليها "ثوابع"!!
- عندك حق..!
-لأ.. معنديش حق..!!
- ليه بقى؟!
- لأن "مينا" إذا كان "وَحّدْ" القطرين.. ف"مرثى" "وَحّدْ" الثلطات..!!