مرسى يرفض الذهاب إلى اسكتلندا خوفًا من ارتداء الجيب الكاروهات!

علم محرر هريدى نيوز من مصدر كتير الكلام نمام وبيتعاطى برشام ومش بيتغطى وهو بينام مما يعرضه لنوبات كثيره من الفشر والنتش والهتش وكمان الزكام ان هناك دعوه قد وصلت للريس مرسى على قصر الاتحادية من الرئاسة الاسكتلانديه بشأن الانعام على السيد مرسى بدكتوراه تانية فخرية وقد أبلغ المستشارون مرسى بها لكن مرسى قد رفضها قائلا اكيد جبهة الانقاذ الوطنى هى اللى ورا الدعوة دى وعايزين يضحكوا الشعب عليا لما عرفوا ان من شروط منح الدكتوراه الفخريه ان الممنوح لازم يلبس الزى الوطنى للبلد المانحه للدكتوراه وخاصة انى فى باكستان لبست السلطانية همه اكيد عايزنى اقبل واروح اسكتلندا علشان اخد الدكتوراه الفخريه ويقوموا الاسكتلانديين ملبسنى الزى الوطنى بتاعهم يعنى البس الجيبه الكاروهات ويقعدوا العيال بتوع فيس بوك وتويتر يتريقوا عليا شهرين تلاته ويقولوا مرسى لبس الجونله ده غير باسم يوسف اللى مش بعيد يعمل على الجونله دى تلات حلقات متصله وتبقى فضيحتى بجلاجل وجرسه بحناجل والبت سما المصرى تعملهالى كليب والعيال يغنوها فى الشوارع والحارات