"المقطم والآخر" يعبر عن سخط نشطاء "تويتر".. "محمد": الشرطة تدافع عن مقر مكتب الإرشاد.. "مينا": مستغرب من الناس اللى مش مصدقة ضرب الإخوان لبنت.. "مؤمن": خلى مشعل ياخد مكتب الإرشاد معاه

حالة من الغضب والسخط انتابت النشطاء على ما حدث بالأمس أمام مقر الإخوان بالمقطم، وما قامت به جماعة الإخوان من ضرب البنات والصحفيين والنشطاء، وقاموا بتدشين "هاشتاجين" أحدهما باسم "المقطم"، والآخر "مكتب الإرشاد"، من خلالهما توعّدا بالعودة اليوم مرة أخرى للانتقام منهم.
محمد بدر قال: "هو أنا المفروض أشوف الشرطة بتتفرج على ضرب البنات الصبح وأحترمه بالليل وهما بيدافعوا عن اللى ضرب.. مكتب الإرشاد".
وقالت علا خطاب: "لما يكون التظاهر أمام الاتحادية أسهل من التظاهر عند مكتب الإرشاد يبقى مين اللى بيحكم مصر؟".
وتساءل سامى نبيل: "يا ترى فى راجل هيسكت على أحداث المقطم.. مكتب الإرشاد إمبارح.. ولا مصر مفهاش رجالة لسه؟؟".
مينا وجيه قال: "مستغرب جدًّا من الناس اللى مش مصدقة إن الإخوان ضربوا بنت، اللى خلاهم قتلوا وسرقوا وخانوا ونافقوا, مش هيضربوا؟؟ مكتب الإرشاد".
وقال روماريو إيهاب: "النهاردة الساعة 6 فى ميدان أبو الحجاج بالأقصر مسيرة علشان اللى حصل فى البت اللى اضربت عند مقر الإخوان فى المقطم.. احشد معانا".
أحمد إبراهيم سعيد قال: "بيحضروا لمعركة تانية.. النهاردة توافدت عربات أمن مركزى ومدرعات شرطة على المقطم".
وقال محمود زيدان: "8 سيارات أمن مركزى ومدرعتين من أجل حماية مكتب الإرشاد.. ناويين تقتلوا كام مصرى عشان جماعة غير شرعية؟ الشرطة المصرية.. المقطم".
وقالت رانيا إبراهيم: "طيب هو فعلًا طلع فيه ناس "15 شخص" اتقبض عليهم إمبارح فى اشتباكات المقطم، والتحقيقات بدأت معاهم من شوية.. المقطم".
أحمد خله قال: "ذات مومنت لما الإخوان المصريين يحتفوا ببطلة فلسطينية توفت، ويشتموا ويخوضوا فى عرض بطلة مصرية ضربوها عشان معارضة ليهم.. المقطم".
بيتر دانيال قال: "حقيقة الإخوان بيعلّوا من قيمة المرأة فى المجتمع بدليل ضرب البنت بالقلم فى المقطم".
وقال مؤمن زيدان: "مكتب الإرشاد ده لازم يتنقل من المقطم.. ودوهم سينا.. أقولك خلى مشعل ياخدهم معاه وهو مروح!!".
وقال محمد عطية: "أنا أختى بتنزل معايا مظاهرات، يعنى كان ممكن جدًّا تكون مكان اللى انضربت إمبارح من الإخوان، وممكن تكون أختك.. انزل واحشد للجمعة الجاية.. المقطم".
وقال عمر حسن: "النهاردة يا نخلّص عليهم يا نخلّص عليهم.. احشدوا.. المقطم".
سلمى "20500 نهضة وتزول" قالت: اللى بيقولوا واخدين مصورين امبارح ورايحين المقطم يضربوا.. هو اللى رايح يضرب ياخد معاه حد يصوره ويفضحه! يا ريت نشغل عقولنا بلاش الأخونة دى".
وقال إسلام مسعد: "الرجالة رايحين المقطم.. ياااه الضرب مع الإخوان يا سلام شكل تانى.. الكل يجهز المولوتوف... هنحرر المقطم النهارده.. المقطم".
وقالت نيرة زهران: "إيه.. مستنيين إيه؟ ليه مندهش إن الداخلية بتدافع عن مقر المقطم أكتر من مقر الاتحادية، آه أصلك مكنتش عارف الرئيس الحقيقى هو اللى فى المقطم".
وقال ميجو: "الموضوع ملوش دعوة بثورة وبتاع.. دية نخوة ورجولة، مش أكتر، علشان كده أنا نازل المقطم.. اللى سكت على ست البنات وكشوف العذرية ملوش مكان وسطنا".
محمود قال: "أنا شوفت عربية شرطة عسكرية ناحية المقر، شكلهم هيعملوا حفلة علينا النهارده.. المقطم".
وقال محمد أسامة: "نداء إلى الشرطة.. اعملوا من بنها يوم واحد بس, اعتبروه أجازة نص السنة زى أيام الانفلات كدة, والشعب مش حينسى الجميل, عن المقطم أتحدث".
حسام بن أسامة قال: "اللى محضرش امبارح أو قبل كده المقطم، دخله شارع المقر هناك الاشتباكات، المدرعات لما بتهجم بيطلع مباحث وإخوان من أول شارعين جانبيين يقبضوا".