علقت الفنانة الشابة دينا الوديدي على نجاح مسلسل "تحت السيطرة" للممثلة نيللي كريم قائلة: «أنا مبسوطة أوي بنجاح مسلسل تحت السيطرة وحاسة بفرحة كل واحد اشتغل في العمل ده، من أول لآخر حلقة فيه تسلسل درامي مختلف ومقنع، فيه كم مشاعر غريبة بادية بتوتر وقلق وخوف ووجع وحنين وحب وكره وغضب وأرق ورضا ونقم على العالم، بتخليك أكتر متعلق بالمسلسل ومهتم تشوفه لحد ما بتنتهي بكم أسئلة لنفسك، وتحاول تتوقع حياة كل بطل من أبطال المسلسل، وتحط نفسك مكانه، عجبني إن الحلقة الأخيرة فيها مساحة للخيال تتخيل انت حياه كل واحد ممكن تروح فين». أضافت الوديدي خلال تدوينتها عبر صفحتها الشخصية على موقع التواصل الاجتماعي «فيس بوك»: «هانيا بعد 4 سنين لما تتعافي وتجمع اللي حصل لها وهي صغيرة ممكن يجلها صدمة ولا حياتها هتكمل عادي، وعلي هيأذن ويستخدم الدين كقناع مختلف عشان يكون عنده مصداقية أكتر لما يكدب ولا لأ، وياترى حد دفن إنجي ولا جثتها عفنت وماتت وحيدة أوي كدة وإحساس جوزها لما ماتت، وطارق من أكتر الشخصيات المعقدة اللي بتفكرني بشريحة كبيرة من رجالة المجتمع المصري هل هيتعافي ولا هيموت بعقده تأنيب الضمير، وطبعا كل الشكر لنيلي كريم على مجهودها الجبار في إتقان دورها».