"شايف بعينى البشارة" شعر أشرف عتريس

الواحد على قد ما عاش
بيقضى العمر يفك الخط
ويقرا الوشم بعينه زى الغجر
حتى العمر يرجع يستخبى جواه
بعد ما يسرح بين الخلق يلتقيه بينادى
يابو قلب طيب جدا من دون البنى آدمين
صدقنى من غير ما أحلف لك يمين
أن غويط البحر بلاط..
لو خطيت برجلك.. هاتعديه
إكمنى قلبك شارع لم يمانع تسكنه كل البنات
شرط الواحدة فيهم يكون للشوق جواها مطرح
الخجل يبات فيه آخر الليل
من غير عقلك ما يودى ويجيب
وتقلبها فى دماغك بحسبة تانى
الليل ما يقدر يسرق بواقى الضى
مدام الروح لسه بتعافر.. مش راضية تسيب الوطن التانى
حقيقه ماينكرهاش غير واحد غيرى
عينيه كارهانى..
واحد غيرى..
جوانى..