الضحكه الصافيه .... محمد مصطفي الهلالي

مبين الصمت
وضحك القلب غناوي
مطرح مايهل نهار وقلوب
قليوب زى الحلم تنام
وتقوم النوم للشغل
للمصنع للمشغل
للمطحن للغيط
وتظيط الدنيا
وضجيج العربيات
الرايحه الجايه
يشق ضباب النوم.
**********
الناس في بلدنا
بتخلف بالبحات
والمقامات
سيدي عواض بطل
له ألف مريد ويزيد
ساكنين علي بابه ليل ونهار
سيدي رضاض شهم ومغوار
مايرجع أي مريد محتار
لكن قليوب م العصر تنام
مبين الصمت
وضحك الضحك غناوي
مطرح مايهل نهار وقلوب
**********
قليوب بتجمع بين قلبين
قلب اخضر لسه مايعرف
ليه المكر أتسكن جو قلوب الناس
والقلب الثاني عمران بالخير حساس
والخير مسكوب م الأيد
مرمي في الأصل أساس
ولما أساس النبت يكون بالخير
يبدل الضلمه بنور
والعشش المهجورة قصور
تتغير كل معالم الدنيا
القٍلة..... وفره.
ونعيم الدنيا بكتره يهل
وتطل علي الدنيا عيون إنسان
قال صاحب القلب الأخضر
ده عمي وخالي وأنا مالي
متركب يعني وفوق الغنوه ملالي
دا حلالي .
حسبه بسيطة .سرير ودولاب
كنبه .كبايه. شفشق ميه
وطشت نحاس وملاية
كام هدمه قطيفة
والمكنة والسهرايه
جيت جنب الغيط وقعدت
والمطحن ف الاوشاش
نقاش والريس فيهم
صاحي م الفجر مصلي الفرض
بتعامل رب كريم
والخير من قلبك
لقلوب الناس وصال
والغنوه موال
منظوم متحدد طوله وعرضه
وطبقه صوته ولونه
كف محني هيمان متهني
وكف سعيد مليان أناشيد
يا ابن الايه
الفرحة ملازماك وياك
د لأن القلب العمران بالخير وياك
شباك والدنيا بتشرق
والشمس كمان بتشقشق
عصافير الكون
حوالين البيت بتزقزق
تفرح كل الناس
وتطل الشمس علي سرير
مفروش أحلام ونسايم
ودولاب عمران بحكاوي
والدار مليانه غناوي
صرخة وقله وزغرودة
أبريق.......لأ... التاني
تبقي أماني ..
هلت بنت الخير والوش جميل
الفرحة ماليه دارين
عشان أول فرحه تهل علي العيلتين
وتشب البنت شقيه عفية
لكن عصبيه
والدمع اقرب ليها من أي جواب
ودموعها بتسابق أي سؤال
وف حضن الجد اتحد فت
همست جوه قلوب الكل
ورده من ازهي عطور الفل
وف بنها عاشت جوه الغربة
بإحساسها المرهف جدا
والباحث ورا كل سؤال
والهارب من الحزن
ورايح جوه عيون الكل
بيسائل وبيتسائل
ان زعلت تزعل حتي عيون الحي
وان ضحكت فرحت
شقت كل سكون الضي
عافرت جاهدت
ودموعها مع كلمه حنيه
شقيه وخطوط الأيد
بتدل علي العصبية
لكن وبجد في عينيها سؤال محتار
والفرحة تقرب
ويهل الورد الصافي
الشارب من النهر الوافي
هل الإبريق الثاني
ورد وسعد..إسلام
الفرحة الجايه
وشايله سرور الأرض
والضحكة الصافية مبتفارقوش
عمرانه جيوب سيالته
واتشعبط قلبه بخالته
وشب في بنها زى أماني
لكن فرق الضحكة الصافية
م الضحكة المليانه سؤال
مدام الأصل الصادق موجود
تبقي الدنيا ورود
وخطوط اليد بترسم رحله كبيره
سر ..أميره !!
الجايه بعد فوات قطرين
قطرين من حزن
اتخطفو في الملكوت
والدنيا سكوت
ويهل الصوت
ويسابق حتي زعيق القطر
ويهل الفجر
يبدد كحل الليل بالضي
تتغرس الحبه في الأرض
وتشق الحبه تعافر تطرح خير
مادام القلب الأخضر اخضر
والقلب التاني عمران بالخير
هيهل الخير.