أيوب رجع

زي نفس الصوت يا صوتي صوت ملايكي جوه قلبي الاخضراني‏..‏ بيناديك صوت حنيني واشتياقي ولهفتي م الخوف عليك وانت وحدك بين آهات الصبر صابر
ف الخلا تدعي وصوتك جسر قايم
ف الخلا تدعي وتتفتت غمايم
جوه صدرك اللي فيه القلب الابيض
والعيون الطيبين اللي بتشع الحنين
واللي فيهم كل غنوة حب دنيا مدوباني
يا اللي قلبك بالتقيه فوق جراح الكل
يمسح أي دمعه
يا اللي حبك عشت بيه
بين الآن الأهل شمعه‏!‏
جيت وباغزل من خيوط الفجر شالك
والأماني
جيت يا عمري وألف عمر وعمر تاني
جيت ونبض القلب سابق خطوتي
مشتاق يجيلك
وف طريق الخير مشيت
الطريق اللي إنت فيه
وف طريق الخير قاسيت
درت في عيون السنين‏..‏ بعت غالي
وكل غالي يا حبيب العمر لجلك اشتريه‏!‏
بس أحضن عمري كله ف نور عنيك
بس ترجع بسمتك
اللي بتبدل جراح المظلومين
وف طريق الخير نسيت
كل جرح في سكتي وانا جايه ليك
كنت حسه إني راكبه مهر أبيض
وبجناح زي الحمامه
جوه قلبي حضن حيخضر ربيعك
صوت بيضوي
فرحتين ويا نبض القلب كانو بيرقصولك
كلمتين يترددوا جوه ف كياني
مستحيل أقدر أبيعك
يا حمامة حب حطت جوه داري
قلبي كان العش ليها والعيون برج انتظاري‏!‏
جايه أشيلك بين رموش العين يا عيني
جايه تمسح فوق جبين لون أنيني
يا اللي من غيرك سنين تشكتيني
ضمني ف الحب ضمه
أحضن الاشواق أديني ياحبيبي
خلي قلبي اللي طار وياك يجيني ويناديني‏:‏
يا الله بينا‏..‏ يا الله نمشي
ف الاراضي البور ندور
نبدر تقاوي الصبر تطرح في العيون أجمل زهور
نحلب نجوم الليل ونشرب ضيها
نشرب ونصبح زيها‏!!‏
ولينا ف عيون الصغار يصبح نهار‏.‏
تتحول الارض السواد خضره
بإدين خفيه حنينه
شوف العجب قدره
نحيي اللي مات من سكات
ونرجع الغنمات
وف قلبنا صوت الضمير
يدوي يجلجل ف الفضا
إصحي وفوقي يا بلد خف الوجع
إصحي وفوقي يا بلد أيوب رجع‏!‏
طلعت سالم
أبو سلطان الإسماعيلية