نشطاء فيس بوك:"لعبة إبليس" تكرار للفيلم الهندي "Race"

وجه عدد من رواد مواقع التواصل الاجتماعي "فيس بوك" تساؤلًا للنجم "يوسف الشريف" بعد أن اكتشفوا أن مسلسل "لعبة إبليس" مأخوذ عن الفيلم الهندي "Race".
وقال أحد النشطاء "ده مسلسل لعبة إبليس زي الفيلم بالضبط،، وكل الفرق أن دور السكرتيرة ومرات أدهم اتعكسوا، الفيلم ده من 2008، هو عشان هندي يعني تضحكوا علينا وفاكرين أن محدش شافه، أنت متعرفش أن فيه قناة اسمها بوليود فاتحة 24 ساعة أفلام هندي، مش عيب إنك تاخد قصة من برة وتعملها معالجة درامية وتحولها لحاجه مصري، العيب أنك متديش كريدت للمنتج الأصلي".
فيما أكد آخرون أنه لا يوجد تشابه بينهما، وأن من قام بربط الفيلم بالمسلسل جاء "على مزاجه". ويقول عبد الرحمن محمود: "الفكره شويه متشابهة بس مش مسروقة لأنك لو شفت الفيلم فعلا وركزت هتعرف أن كل أحداثه غير أحداث المسلسل، يوسف الشريف فكرته مختلفة وطور منها كتيير، متقللش من اللى هو عمله لأن تقريبا هو الممثل الوحيد اللى بيطور من نفسه وبيعمل حاجة نضيفة".
وتقول حنين السيد: "ماتستمتعوا بالحاجة المعروضة وخلاص يا جماعة ليه يعني متقولوش أنه شيء كويس في المسلسلات بدل الرقص والأغاني والتفاهات التانية، ولا هو كل عمل ناجح عامل ضجه ف البلد هتعضوا تعملو فيها ستيديو تحليلي".
وتقول رورو الإبياري "كفاية أنه مسلسل محترم مفيهوش إسفاف ولا ألفاظ خارجة ولا إيحاءات مقرفة ولا رقص هابط أنا فخورة بيوسف الشريف بتفرج أنا وعيلتي عليه بدون خجل وكل مسلسلاته كده ياتري هو ده إلى مضايقكم".
يذكر أن "لعبة إبليس" بطولة النجم يوسف الشريف، وشيرى عادل، ومحمد رياض، وفريال يوسف، وهبة مجدى، وإيناس كامل، وعمر السعيد، ومحمد سليمان، وتميم عبده، وأميرة العايدى، وآخرين، وهو من إخراج شريف إسماعيل، وقصة إنجى علاء، وسيناريو وحوار عمرو سمير عاطف.