شلاليت

السويس.. بورسعيد.. وإسماعيلية
عاملين ثورة شديدة قوية
وبإضراب ثايرين في الشارع
ومافيش فايدة أنا وانت وهي
والسلطات سايبينها في هيصة
كل شوية في كارثة عويصة
قتل وضرب وحرق وسرقة
والسلطات ع الصمت حريصة
بكرة حتندم ياللي سامعني
ومولعها حريقة طاوعني
مش راح تكسب لما حتلعب
وللا في سوق حكمك حتبعني
اسمع مرة كلامي وفوق
لو حتسيبنا الناس حتروق
سيب الكرسي المركب ترسي
وللا الشعب مالهش حقوق
د التحرير مابقاش تحرير
لماَّ عقولنا خلاص حتطير
والدخان في قنابل نازل
كل شوية الأمن خطير
هي دِ ثورة ياريس.. قُول
اللي أنا شايفه ماهش معقول
واللي باشوفه وأعيش في ظروفه
كل شوية خطب علي طول