بالفيديو.. ننشر قصيدة هجاء "مرسى".. التى أحالت طالبة بالثانوى للتحقيق

قالت الطالبة سالى السيد، التى أحيلت للتحقيق فى مدرسة السيدة زينب بمحافظة الغربية، بسبب إلقائها لقصيدة هجاء للدكتور محمد مرسى فى الإذاعة المدرسية، إنها عبرت عن رأيها، دون أى تجريح أو إهانة له.
وأضافت "سالى"، خلال لقائها مع الإعلامى وائل الإبراشى فى برنامج "العاشرة مساءً" على قناة "دريم2"، أنها تكتب الشعر الذى يعبر عنها، وأنها سبقت وانتقدت مبارك فى قصائد ولكن لم يحدث لها ما حدث بسبب قصيدة هجاء مرسى، وألقت الطالبة القصيدة التى تسببت لها فى هذه الأزمة وهذا هو نصها.
(حس)
حس يا سيادة الريس بينا
حس بالنار اللى والعة فينا
حس بشهيد حلمه ضاع
حس بقهرة أهالينا
ليك رب هتقابله.. طب هتقوله إيه؟ لما يسأل جنابك علينا.
(حس)
حس بشوارع مليها دم
حس بقهرة أب وأم
حس ببيوت جُواها هم
والقلوب مليها الغم
حس ببلد بتموت
وعز شبابها بيتسم
(حس)
حس بجدع عياله جاعت
نزل يوكلهم فكرامته اتباعت
اتسحل واتعرى فى وسط حكومتك
وبعد ده كله حقوقه ضاعت
(حس)
ده أنا المصرى ابن البلد
حلمى فى وسط الميدان اتولد
حلمى فى بلدى تعلى لفوق
وحلمى قدامى اتعرى واتجلد
(حس)
يا سيادة الريس شرفك فين
لما اتعرى المصرى الهمام
لما اتسحل واستغليت إنه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا أسيبك تنهش
فى لحم بلدى زى زمان
ما أصلى خلاص م الموت معودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه م تقدر تنساه
الموت أب انكسر ظهره
ابنه كان ظهره وقواه
الموت يعنى مستقبل بيموت ويضيع
وتموت أحلامك وياه
حق اللى اتعرى يا ريس فين؟
ولا هو اللى عراه أصلا مين؟
اللى عراه ظلمك وكدبك
اللى عراه حكمك المهين
اللى عراه ديابة ملهاش إحساس
اللى عراه كلاب "مسعورين"
اللى عراه سكوت.. اللى عراه جبروت
اللى عراه سلطة بتكسر عين
(حس)
ورسالتى أخيرة لنظام جبان
نظام فاسد ملوش عنوان
لو هموت
لو دمى منك يلاقى الجحود
وتهددنى بسجن ظلام
ولا لوجوده أى وجود
مش هتسكت فيا الصوت.