STates& tweets

تامر عبد المحسن : اليوم .. يقوم الإسلاميون بعمل سلسلة بشرية لمطالبة وزارة الاتصالات بحجب المواقع الإباحية .. دعوة لكل القوى الليبرالية للقيام بسلسلة بشرية لدعم المواقع الإباحية للحفاظ على مدنية الدولة مع عرض فيلم إباحى على البروجيكتور.
رحاب محمد: إحنا فى زمن غريب..... تلاقى بنت عندها 12 سنة كاتبة علي الفيس بوك: أنا بكره الحب.. ومش هحب حد تانى .... وتلاقى واحدة عندها 22 سنة كاتبة ممكن حد يبعتلى برسيم علشان عايزة أأكل البقرة فى المزرعة السعيدة ؟!
محمد احمد: الشعب المصرى يترك الفيس بوك لأنه زهق!! وبعد ثلاث دقائق يرجعله تانى لأنه زهق.
نورا السيد: تعرفوا الست المصرية علشان تعرف انبوبة البوتجاز سليمة ولا لا بتعمل إيه؟ بتولع عود كبريت على فتحة الانبوبة لو محصلش حاجة تبقى سليمة و لو انفجرت تبقى بتسرب ولازم تتغير !
جميل محمد: صباحى بيقول لو كنت رئيسا لشاركت فى رسم الجرافيتى... يعنى لازم تكون رئيس علشان تنزل ترسم معاهم .. فرشتك فى إيدك معجونك على كتفك اللى يقولك أنت مين قوله انا الرئيس الجديد !
مرسى السيد: الصديق الحقيقى لما تيجى تعمل مصيبة يفضل ينصح فيك ينصح فيك .. ولو مقتنعتش .. يعمل المصيبة دى معاك.
حسن مرسى: حكمة اليوم.. إن لم تستطع إسعاد نفسك .... فعكر مزاج الآخرين.
ميار محمد: راجل قاعد يحمد ربنا انه مش صينى ! واحد سأله لييه؟ قال انت بتستهبل ... انا معرفش ولا كلمة صينى.!
إبراهيم السيد: محدش ليه الحق إنه يقتحم خصوصياتى ويبص فى الموبايل بتاعى إلا أنا والراجل اللى بيقعد جنبى فى الميكروباص.
إيمان لطفى: فى اليابان و الدول المتقدمة لما طفل يبدأ يستوعب و قبل ما يتكلم يجيبوا له آى باد و يعلموه عليه و يخلوه يفكه ويركبه .... إنما أول حاجة نعلمها للطفل.... يلا يا حبيبى تف على عمو..... التربية المصرية ام الاجنبى!
رحاب مرسى: جميل أن تكون فاشلا لكن الأجمل أن تجد أناسا فاشلين مثلك يساندونك فى فشلك... و الأجمل أن تجد أناسا فاشلين اكتر منك علشان تحس انك ناجح!
نهى محمد: لما اتنين مرتبطين بيتخنقوا مع بعض بيعملوا على الفيس بوك سنجيل .....طيب لما يتخانق مع أبويا أمى هاعمل إيه ؟؟ يتيم
ياسر محمد: شكرا يا حظى أنت الوحيد اللى متغيرتش معايا ..... طول عمرك فقر
محمد عيسى : فى امريكا لو زمرت بعربيتك من غير سبب هتدفع غرامة 75 دولارا وقتى.... أما عندنا بقى...... عايز تسلم تيييت عايز تعاكس تييييست عايز تنادى على حد تيييييت عايز تشتم حد تيييت حتى لو مشغل اغنية هتمشى مع اللحن بالكلاكس !! ينفع كده يا ولاد التييييت
ميار السيد: اطفيه وشغله تانى هى الخطوة الأولى لتصليح أى حاجة خربانة فى مصر.