ديالوج

SAMIRELGAMEL@YAHOO.COM
قبل أن تجرى جولة الإعادة.. وبعد أن اختفت باقى الرموز وعادت إلى مواقعها.. هبط «النسر».. وغابت «الشمس» ودخلت «البلطة» فى لوح خشب ولم تخرج منه.. وتراجع «الحصان» .. وحنت أفرع «الشجرة» .. ووقفت «الساعة» .. وفشلت «الكاميرا» حتى فى التقاط صورة واحدة لصاحبها.. وأفلت «النجمة».. ولم تفلح «السيارة» أن تمشى خطوة واحدة لأنها بلا موتور.. وسقط «الهرم» وتحول إلى كوم تراب.. وبذلك خلت الساحة إلا من «السلم».. و«الميزان» على الحلبة وحدهما .. وكان بينهما هذا الحوار:
السلم: تعرف تطلع لى يا باشمهندس ميزان.. ولا صعب عليك!
الميزان: حقك تفرح بنفسك.. لكن تفتكر الجولة اللى جاية.. هتخليك تطلع فوق أكتر.. ولا أنا بعون الله أقدر أخليك تنزل لي!
السلم: طيب ما تيجى نتفق سوا.
الميزان: ياريت.. يا سلم باشا لكن سكتك غير سكتى
السلم: أنت كده بتصعبها على نفسك!
الميزان: أنا ملاحظ أن الثقة عندك زيادة شوية
السلم: وليه مش عايز تعترف أنها حسابات مظبوطة وبعدين يا أخى مش هى دى الديمقراطية؟
الميزان: يعنى تعمل ثورة على نظام مبارك تكون هديتنا فى نهاية المطاف وبعد الشهداء والمصابين .. «رئيس وزرائه» .. يحكمنا..!
السلم: الشعب هو اللى طلب الأمان.. كفاية فوضي!!
الميزان: ومين اللى عملها غير النظام وأعوانه .. وبعدين يا أستاذ «سلم» .. أنت طالع عشان تصفى حساباتك مع الثوار؟!
السلم: أظن أنا قلت على الملأ.. أيدى ممدودة للجميع
الميزان: ما هو الحاج حسني.. قال أول ما استلم السلطة هى دورة واحدة وامشى.. واكتشفنا أن الدورة عنده لها أول وملهاش آخر.
السلم: أنت بتتكلم كأنك الملاك الطاهر البرىء تقدر تقوللى يا احتياطي.. مش كان كلامك أن الرياسة مش فى حساباتكم.. وفجأة بقت هى الحسابات كلها.. ده غير البرلمان وجمعية الدستور.
الميزان: افهم كده أن نجاحك فى الجولة الجاية مضمون..؟
السلم: وليه لأ.. وبعدين فيه أصوات كثيرة هتدخل فى حسابي!
الميزان: وأنا كمان.. بس احنا عايزين الثورة تستمر يا سلم «الفلول»
السلم: يا ميزان الإخوان.. أنت مش لوحدك فى الميدان؟
الميزان: بس مدني.. وسمعتى زى القشطة.
السلم: كده دخلنا فى شغل اللبن والزبادى والبقالة خلينا نتكلم السياسة!
الميزان: قصدك نرجع الأوضاع زى ما كانت .
السلم: وإذا وعدتك أنك تلعب فى النور!
الميزان: أنا الأقرب لقصر الرياسة.. الأرقام بتقول كده.
السلم: خلاص خلى الأرقام تنفعك!!
الميزان: ممكن أعرف حضرتك جايب الثقة دى كلها منين وأنت أصلا معزول؟
السلم: أهو الكلام اللى مش جايب تمنه.. ما تقول حاجه جديدة!
الميزان: هأقول الجديد كله.. فى لجنة الإعادة!!