يوميات سنية والمحروس في المصيف!

"كان يوم اسود يوم ما شفتك..كان يوم منيل يوم ما عرفتك"..ده الموشح اللي دايماً أسمعه كل سنه لو رفضت أطلع المصيف..فبحاول آخدها من أصيرها واوافق على طول..هو صحيح انا كنت برفض عشان الميزانية لا تسمح..لكن حتى لو الميزانية كانت تسمح..
المشكلة في سنية وخيبتها القوية..لازم تروح البلاج شايله شيء وشويات..إشي حلل محشي على كام برميل مخلل..ده طبعاً غير صواني البسبوسة والذي منه..
وياريتها جت على كده..لازم تجيب لي نضارة الغوص وتجبرني ألبسها وانا على الشط..هتقولولي وايه يعني..ايه المشكلة؟..هقولكم المشكله انها داهنة القزاز باللون الاسود..قال ايه عشان مابصش ع الوظاويظ اللي ع الشط..اقولها يا سنيه وظايظ ايه وبتاع ايه..دانا كرهت جنس الستات كله..مفيش فايده!!
مرفوض أكل الإناث
بيني وبينكم انا اتعقدت من الستات فعلاً..واي مخلوق ينتمي لجنس الستات..يعني مثلاً اروح لبتاع الفراخ..اشتري منه ديوك..ولا المس جنس فرخه..حتى اللحمة الحمرا..اروح للجزار أطلب لحم تور..مش جاموسه..وآخر مرة رحت له غلطت ووقعت بلساني..بيسألني "جرى ايه يا استاذ زنكلوني..ايه اللي جرالك..مش عايز لحمةجاموسة خالص؟"..طبعا مادريتش بنفسي الا وانا بقوله.."ما كفاية الجاموسة اللي في البيت!!"..حمدت ربنا انه ما فهمش بدليل انه قال.."بقى كده يا استاذ زنكلوني؟..بتربي جاموسة في البيت عشان ما تشتريش مني لحمة؟!"
المهم..رمضان السنه دي جاي بدري فطبعاً طلعنا كلنا بالعربية عشان نلحق نصيف..وكما هي العادة ركبت انا وسنية والعيال والشنط قدام..وحلل المحشي والبامية والرز والفاصوليا ركبت ورا على الكنبه..اما الصواني كترخيرها..فدي قعدت في الشنطه..إشي بسبوسه بالقشطه وجلاش وكنافه بالمهلبية والمكسرات وقزايز الكازوزه..وطبعا سنيه كتر خيرها ما نسيتش تحط وابور الجاز والفرن البلدي والطواجن الفاضية فوق سقف العربيه اللي كان طابق على نفسنا من كتر الوزن!!
الله يكون في عونك يا عربيتي يا غاليه عليا وشايله همنا..بصراحة برغم عيوب سنيه..لكن في بعض الاحيان بيبقى فيها ميزة برضه..واحنا ماشيين ع الصحراوي وقفتنا لجنة مرور..رحت مكلم الظابط وانا بترعش.."خير..فيه حاجه يا باشا؟" رد عليا.."فيه حاجه؟..كل ده وبتسأل؟..غرامه امن ومتانه طبعا 50 جنيه..دي مش عربيه..ده بيت متنقل"..بصيت لقيت سنيه اتفتحت زي الحله البرستو اللي اتخرم غطاها وقالت.."جرى ايه يا خويا..هو انتو رجعتوا تتنوا وتتفردوا علينا ولا ايه..عليا النعمه أوقف لك الطريق الصحراوي واعمل لك اعتصام وأوصل الموضوع للفضائيات ولعصام شرف ذات نفسه"..لقيت الظابط بص لأمين الشرطه اللي جنبه وقال بصوت واطي "هما الجماعة البلطجية دول مش كانوا قبضوا عليهم؟!"..لسه سنيه هتفتح بقها لقيت الظابط بيصرخ ويقول.."حقك عليا يا هانم..والله انا اللي غلطان واستاهل ضرب الشبشب..امشي بسرعة يا استاذ"..راحت سنيه مكمله بصوتها اللي زي زمارة القطر..وكمان كنت عاوز تاخد غرامه 50 جنيه..وديني لأوريك"..لقيت الظابط راح مطلع 50 جنيه من جيبه واداها لسنيه وقالي.."ابوس ايدك تطلع بسرعه..انا هيجيلي سكته قلبيه"!!..قلت في عقل بالي.."والله وطلع ليكي فايده يا سنيه!!"
وصلنا اسكندريه..ونزلنا في شقة بنت خالة مرات ابن عم خالتها اللي ساب لنا الشقه من كتر زن سنيه..تاني يوم طلعنا ع الشط..وطبعا شلت انا الحلل والشمسيه والكراسي والصواني..ومشيت زي حمار العنب ورا سنيه والعيال..وبعدين قعدت ع البلاج قرفان من العيال وامهم والستات كلهم..قلت اطلع الجرنال اقعد اقرا شويه..يمكن انسى الهم اللي انا فيه..اول ما مسكت الجرنال لقيت فيه حاجه غريبه..ايه ده؟..الجرنال مخروم..أتاري العيال الشياطين دول قصوا صورة كذا فنان من الفنانين اللي بيحبوهم مع اني لسه جايب الجرنان وما لحقتش اتهنى بيه..يللا مش مشكله..بس المصيبة ان سنيه وهي ماشيه تتمخطر زي البطة المتزغطه اول ما شافت الجرنان كده صوتت ولمت علينا الشط كله وقالت.."يا لهوي ي ي ي ..بتبصبص ع الوظاويظ تاني يا زنكلوني؟..وقعتك سودة زي قرن الخروب يا منيل"..طبعا كالعادة مش فاكر اللي حصل..لكن كل اللي حاسس بيه اني مدفون في الرمل ومش باين مني إلا راسي..اللي سنيه حاطه عليها حلة المحشي وجنبها حلة الباميه وبرطمان الطرشي..وسامع صوتها بتتكلم وتقول.."قررب قررب يللي في البلاج..المحشي الطازه..الواحدة بجنيه!!"
بقلم عمرو عكاشه
------------------------------------------------------------------------
المحروس على البلاج!!
هاموت واطلع مصيف..واطلعه ازاي والمحروس جوزي بيستخسر يدفع مليم في حاجة بيعتبرها من باب الرفاهية اللي ملهاش لازمة..فاتحته أكتر من مره في الموضوع فيرد عليا ويقول "لو هتموتي وتبلبطي في الميه..وماله..املي البانيو ميه وريحينا"..آخر ما زهقت جازفت واشتركت في رحلة تبع الشغل لمرسى مطروح..أول ما عرف بدأ خميرة العكننه..ازاي وازاي اتصرف من غير ما اقوله..ليه طرطور؟!!..ليه بودنين؟!!..وزي ما توقعت بدأ يلين شويه شويه لما استوعب انه مش غرمان حاجة..واللي طمنه أكتر ان فيه ناس تانية كتير طالعة المصيف يعني مش هنبقى (بعد الشر) بوزنا في بوز بعض طول الرحلة!
ومفيش يومين وما بقاش فيه حاجة شاغلاه أكتر من انه ياخد معاه ايه للمصيف..ولأن المايوه اللي عنده قديم وما بيدخلش فيه دلوقتي ضرب بوز واتمسكن..فعرضت عليه زي الهبله ادفعله تمن المايوه..لقيته ابن الاروبه ما صدق فاشترى مايوه من النوع المستورد وشبشب بحر ونضارة ميه وبشكير ولوشن عشان الشمس..لقيت نفسي بادفع ومابنطقش..واتعكيت انا في توضيب الشنطة وتجهيز السندوتشات..ومع ان الشنطة من النوع الكبير الا ان البيه تقريبا جاب الدولاب كله معاه فاضطرينا نتنطط فوقيها احنا الاتنين عشان تتقفل!
وفي المحطة واحد ابن حلال عرض يساعد يشيل معانا الشنطة فاستغرب من تقلها فقاله المحروس "ما انت عارف الستات..كان ناقص تجيب التسريحة كلها معاها!!!" اتفقعت..بس كبرت دماغي عشان الرحلة متتعكرش خاصة واني لقيت زمايل ليا من الشغل طالعين مع مراتتهم..فمش ناقصه فضايح..أول ما وصلنا مفيش ساعتين وبقى المحروس وزمايلي أصحاب!!..يقضوا القعده ضحك وتهريج ويلعبوا طاولة ويتسابقوا في الميه وأنا بقيت اتساير مع مراتتهم..وطبعا مفيش حلاوة من غير نار..كل ما يمر بتاع الفريسكة أو الجيلاتي أو الحاجة الساقعة ألاقي المحروس يشاورلهم ويعزم جامد على الموجودين ويشاورلي قدامهم عشان أحاسب..بقيت في نص هدومي ومش مصدقة نفسي ازاي مش مكسوف من نفسه وهو بيعمل كده..واتكرر الموضوع كتير وأنا عماله ادفع ومابنطقش!!
بريستيجي رايح جاى
بس ماكدبش عليكم..انا كنت خايفه ان المحروس يفضحني قدام الناس..ودول مش اي ناس دول زمايلي في الشغل..بس الراجل عداه العيب..اي نعم بيستغفلنى وشغال يلهف مني فلوس..بس بأدب..هي اشارة بس..بصراحه عشان اكون حقانيه..المحروس كان مديني برستيجي قدام الناس..فكنت حاسه بنفسي شويه..أي نعم بياخده تاني لما ندخل اوضتنا..بس مش مهم..المهم ما اتفضحش قدام زمايلي..ده انا كان هيغم عليا لما لقيت المحروس فجأة وبدون مناسبة بيناديني قدامهم "عصمصم"..لدرجة اني قعدت ابص حواليا فاكراه بيكلم حد تاني..ده عمره ما دلعني!!
مفيش يومين وحسيت ان زمايلي مابقوش يضحكوا ويهرجوا زي الأول وكمان مراتتهم بقوا شوية متحفظين معايا..يوم كمان وبقت الستات كلها واخده جنب ما بينطقوش ورجالتهم واخده جنب تاني والمحروس جوزي رايح جاي..يقعد مع دول شوية ومع دول شوية..حاولت أعرف اللي بيحصل ومفيش فايده..على آخر يوم لقيت مفيش ولا واحده من الستات نزلت من أوضتها والرجاله كلها على الشط وشهم يقطع الخميرة من البيت والمحروس ولا الهوا آخر انسجام وفرفشه وبيلعب طاولة مع نفسه!!
اتجننت وقررت أروح لأي واحده فيهم أسألها ايه الحكاية..وقبل ما أوصل لأوضهم سمعت صوتهم جاي من صالة قريبه وشكلهم كده عاملين اجتماع, وسمعت واحده بتقول "بقى دي آخرة العشره..لسه مش واثقين فينا!!..يعني هي تطلع مين دي ولا أحسن مننا في ايه عشان جوزها يديها مرتبه تعمل فيه اللي هي عاوزاه"..فقاطعتها واحده تانية وقالت "شايفين بيعاملها ازاي!!..دول ولا اللي لسه في شهر العسل..جتنا نيله في حظنا الهباب"..فردت تالته وقالت "لو متعدلوش ونفذوا طلباتنا هنخلي عيشتهم هباب"..ولقيتهم بيهتفوا في نفس واحد على طريقة شعبولا "متفكرش كتير وادفع المعلوم..يا عيشتك تبقى طين ومايجلكش نوم..ايييييييييه ايييييييييييه"!!
بقلم رانيا صالح