عوضين ابن ستيتة كلاف البهايم وقد دخل مهرولا إلى دوار العمدة عبد الستار "منعكش" الشعر مهلهل الثياب مغبر الوجه مقطوع الأنفاس يصيح بأعلى صوته مستغيثًا: الحقنا يا جناب العمدة.. الحقنا يا جناب العمدة... العمدة وقد قفز من مكانه كمن لدغته حية رقطاء: في إيه ياض يا عوضين الله يخرب بيتك فزعتني ؟؟!! عوضين كلاف البهايم: النار.. يابا العمدة... النار.. مرة واحدة كده واحنا قاعدين في أمانة الله لقيناها شبت في بيت حمادة أبوسليمان وخلته حتة فحمة سودة، وإحنا بنطفيها لقيناها بقدرة قادر انطلقت في بيت عبد الرحيم غراب قبلي الترعة رغم أن كلهم مش موجودين ومسافرين يصبحوا على بنتهم اللي اتجوزت إمبارح في المنصورة، وعلى بال ما لحقنا نطفيها بعد ما حرقت الدور الفوقاني كله، لقيناها راحت مولعة في بيت سلامة المنشواي في أول الكفر وهو وحريمه كانوا خارجين من جوه يولولوا بعزم ما فيهم ويرقعوا بالصوت الحياني قوم سبت الرجالة بيطفوها وجيت أقول لك يابا العمدة.. لقيت سنية العمشة قاعدة بتلطم على سداغها على حجر عريض جنب عشتها المولعة وزباينها المساطيل عمالين يملوا فوارغ الجوز والشيش من الترعة وبدل ما يطفوا بيها النار عمالين يدلقوها فوق نافوخها لحد ما سورقت منهم وبتطلع في الروح وهم برضه مش عاتقينها، وأهالي البلد المصحصحين عمالين يحوشوهم ودوكهم يشتموهم ويقولولهم يا عالم حرام عليكم انتم مش شايفين النار والعة ؟ وكمان مش عايزينا نطفيها يا كفرة ؟!! الله يخرب بيوتكم.. أما عالم أندال بصحيح !! العمدة متصنعا الفزع والاهتمام: لا ده موضوع خطير جدًا وما يتسكتش عليه أبدا.. ده أكيد شغل مردة من الجن وعفاريت ولاد جنيه، حد غشيم في البلد حضرهم وما عرفش بغباوته يصرفهم وهيضيع البلد كلها معاه.. الله يخرب بيوتكم.. وفي غرزة شهيدة البلد سنية العمشة التي ماتت غرقا "في شبر مية" بينما كانت عشتها تحترق بجوارها والرجال يتصارعون لإطفائها، وبعد أن تطوع العمدة عبد الستار مشكورا بإعادة الغرزة إلى حالها في مشروع قومي عاجل لأنها متنفس البلد الوحيد تحت إدارة معلمتها الجديدة باتعة الكرتة بنت سنية العمشة دارت الحوارات التالية: الشيخ حسونة العجاتي مؤذن الزاوية بغضب شديد: كل هذا والعياذ بالله من ممارسة أعمال السحر والشعوذة التي تستدعى غضب الله، ربنا يهديهم نحن في عالم وهم في عالم بعيد آخر، ليه تلعب في اللى ماتعرفش حاجة عنه ؟!! وبعدين الأنس بالله جميل وتكون في آمان رب العالمين كفياكم أذية في خلق الله ونقص في الايمان، كن مع الله تكن أقوى الناس ويحميك ويبسط أمانه عليك يا مؤمن. العمدة منشكحا: الله عليك يا شيخ حسونة يا عترة المشايخ يا بركة هو ده الكلام المضبوط. أحمد الشرقاوي الطالب في إعدادي هندسة مستنكرا: اشمعنى ما بنسمعش عن الكلام المتخلف ده في أي حتة تانية في العالم غير عندنا إحنا بس ؟!! الشيخ حسونة وقد كاد أن ينط في كرشه: أستغفر الله العظيم أهو ده الكفر والإلحاد بعينه.. الجن والسحر مذكورين في القرآن يا ولد ياللي لسه ماطلعتش من البيضة وجاي تلسن على مشايخك وكوبراتك !! وبعد أن فرق الحاضرون بينهما وهدوا الشيخ حسونة، قال جيكا الثورجي ناظرًا من تحت لتحت ناحية العمدة ومخاطبا أهالي البلد: جن إيه وكلام فارغ إيه يا إخوانا... شوفوا مين إللي له مصلحة والموضوع مش هيخرج أبدا من عنده، تلاقيه حد بيحفر على آثار وبيعمل دوشة عشان الناس تنشغل في الترميم وماحدش ياخد باله أنه لقي آثار ويكمل حفر ورمل طالع ورمل داخل..عادي يعني، ولا واحد عايز ناس تطفش من مكان أو واحد عايز يشتري بيت بسعر رخيص أو أي مصيبة تانية، الاحتمالات كتير ومحتاجة ناس من النوعية اللي بتفكر... وخاصة أنه حصل مرتين قبل كده وده يثبت نجاح الإستراتيجية، دوروا على المستفيد في الحالتين هتقربوا من الحل أكتر. العمدة وقد استشاط غضبًا: لا يا عم جيكا انت فكرك راح لبعيد خالص إحنا بلدنا فيها آثار يا راجل !! قول كلام غير ده ربنا يهديك يا حبيبي. شيخ البلد غامزا للعمدة من طرف خفي: أكيد الإخوان هما اللى بيولعوا كل الحرايق دي، دول أقوى من الجن والعفاريت يا راجل !! داهية تاخدهم كلهم يا شيخ هم واللي يتشدد لهم كمان.. قادر يا كريم.. جيكا الثورجي معترضا: يووووه رجعنا تاني "لعنب ديبو" يا عم مانتم لمتيهم كلهم من زمان وقاعدين مآنسين بعض في أراميدان لحد ما خللوا.. العمدة عبدالستار وقد رفع يده حسما للجدال قائلا: بس يا جماعة أنا بكره بإذن الله من النجمة هاشد تليفون على مصر للست لولي كودية الزار المتصيتة في حي الزمالك، وهي تيجي تقول لنا أصل الموضوع ده وفصله إيه... الست لولي وبعد أن أطلقت بخورا خاصا وبعربية مكسرة: بصوا مش الهوادث دي هصلت بعد المنظومة الجديدة بتاعة العيش يا جماعة.. الجن دلوقتي يا عيني مش لاقي ولا فرن واحد يشتري منه عيش من بتاع الدعم غير بالبطاكة، ومافيش إلا العيش أبو 3 ب بجنيه بديهي أنه يغضب ويثور.. الحل في إيد وزارة التموين تصدر بطاقات صرف عيش للجن عشان العفاريت بتوع الوزارة منشفين ريقهم خالص يا ولداه.. وهنا يتدخل العمدة عبد الستار قائلا: بقى هي الحكاية كده يا ست لولي ؟!! وحياتك لخلي الفلاحين يعملولهم فطير مشلتت كل يوم ويودوه لغاية عنديهم كمان.. وبعد يومين من خبيز الفطير المشلتت تتوقف الحرائق في البلد ويعود كل شيء لطبيعته.. بينما كان العمدة يودع الست لولي التي كانت في الحقيقة مندوبة لإحدى السفارات الأجنبية وهي تحمل حقيبتها الدبلوماسية غير القابلة للتفتيش وفيها قطع نادرة من آثار وطننا الغالي، وقد تركت العمدة و(الأضيشة) يعدون ملايين الدولارات الخضراء، ويخططون بكل هدوء لضربتهم القادمة.
