قصة فتاة مع المتحرشين الصغار

واصلت مبادرة "خريطة التحرش الجنسى"، اليوم السبت، بنشر قصص الفتيات اللاتي تم تعرضهن لحالات التحرش الجنسى في الشارع، وذلك ضمن حملة "مش ساكتة" التي أطلقتها المبادرة للقضاء على هذه الظاهرة المنتشرة في المجتمع المصرى.
وننشر تفاصيل القصة:
النهاردة كانت صاحبتى هتشترى حاجات من مطعم قريب من بيتى فجت عندى الأول وقالتلى إن في ولاد حوالى 6 أو 7 سنهم ميعديش 10 سنين رخموا عليها فى الشارع وهي مسكتتلهمش.. شجعتها ونزلنا مع بعض المطعم لاقينا نفس الولاد وواحد منهم فضل قدامنا يستظرف وبعدين دخلنا المطعم قاموا دخلوا ورانا وفضلوا يدخلوا ويطلعوا ويستظرفوا والكل شايف إنهم بيرخموا علينا وساكتين لحد ما اتعصبت وزعقت فيهم وشتمتهم وطلعتهم بره.. واحد من اللى واقفين قاللى حضرتك مش مفروض تردى عليه رحت زعقت فيه وقلتله أمال مين يرد ويعلم طفل زى ده الأدب، ومحدش تانى اتكلم.. جينا نخرج لقيناهم على الناحية التانية من الشارع لا إحنا عارفين نكمل ولا نعدى.. ومن حسن حظنا جم ولدين كانوا فى المطعم وساعدونا نعدى ومشيوا معانا لحد بيتى وفهمت منهم إنهم واقفين من بدرى عشان ياخدوا بالهم مننا.. بجد حاجة تقرف لما أطفال يبقوا كده آسفة لو طولت لكن شكرا لكل ولد بيساعد بنت فى الشارع لأنه بجد بينقذها.