هو ■ إيه الكلمة اللى كان نفسك تقولها وماقلتهاش؟ - واحد صاحبى كان بيعمل حاجة غلط وماردتش، أقول له ده غلط عشان مايزعلشى. ■ والحاجة اللى كان نفسك تعملها وماعملتهاش؟ - كان نفسى أدخل كلية الهندسة بس منه لله المجموع. ■ إيه اللى يخلى الواحد يبيع أهله؟ - إنه ما يعرفشى قيمة الأهل، وإنه يفكر إن فيه حاجة فى الدنيا تستاهل إنه يخسر أهله عشانها. ■ إيه أكتر موقف محرج عشته؟ - كنت مرة راكب مواصلات ونسيت الفلوس فى البيت، فما كنتش عارف أعمل إيه، لكن الكُمسرى طلع ابن حلال وحس إنه مش معايا فعلا، فسابنى. ■ أحرجت حد قبل كده ؟ - ساعات لما بلاقى حد سايق فيها، باحرجه عشان يفوق ويبطل يعيش الدور علىّ. ■ إيه السر اللى لحد دلوقتى ماقلتهوش لحد؟ - كان واحد صاحبى بيحب واحدة زميلته، وقال لى واحتفظت بالسر ده، ودى يمكن تكون أول مرة أقدر أحافظ فيها على سر. ■ إيه الحاجة اللى مستنيها تحصل؟ - إنى أخلص الكلية بتاعتى وأشوف مستقبلى، عاوز ابتدى أبنى نفسى بقى. ■ وقعت قبل كده ؟ - أيوه، فى تانى سنة فى الكلية لما سقطت. ■ وإيه السبب فى سقوطك؟ - بصراحة إهمالى وعدم تركيزى فى مذاكرتى. ■ وخرجت إزاى من الأزمة؟ - والله ربنا بيستر، حاولت أركز وأدى للمذاكرة حقها وربنا كرم. هي ■ إيه الكلمة اللى كان نفسك تقوليها وماقلتيهاش؟ - الحمد لله، مش مخلية نفسى ف حاجة، كل اللى باعوز أقوله باقوله. ■ والحاجة اللى كان نفسك تعمليها وماعملتيهاش؟ - إنى أسوق طيارة. ■ إيه اللى يخلى الواحد يبيع أهله؟ - الندالة، ولما مايتمرش الخير فيه.. بس نهايته بتبقى سودا. ■ إيه أكتر موقف محرج عشتيه؟ - إن الشوز بتاعى اتقطع قطع ملحوظ وأنا رايحة مشوار مهم جدا لا يقبل التأجيل، واضطريت أروح كده. ■ هل أحرجتى حد قبل كده؟ - أيوه، كتير بس مش فاكرة ولا موقف فيهم حاليا. ■ انتى أمينة على أسرار الناس؟ - بحاول أراعى حقوق وخصوصيات الناس اللى استأمنتنى على أسرارها ومش من حقى إنى أطلعها، بمجرد ما أبطل كلام فيها معاهم مش بفتح تانى كلام إلا معاهم. ■ إيه الحاجة اللى مستنياها تحصل؟ - نفسى ألاقى شغلانة مناسبة تبع الحكومة. ■ انتى سالكة ومخلصة، ولّا غلبانة؟ - سالكة طبعا، ومخلصة وماقعشى بسهولة.
