إيناس جوهر: 16 جنيهًا أول أجر لي في الإذاعة

الإذاعية الكبيرة إيناس جوهر، فتحت قلبها إلى «التحرير» في حديث مطوّل، وطلبت أن تكون أغلب أسئلة الحوار خفيفة، انطلاقًا من خفة روحها التي أسعدت كثيرين طوال مشوارها.
"غمض عينيك وامشى بخفة ودلع، الدنيا هي الشابة وأنت الجدع، تشوف رشاقة خطوتك تعبدك، لكن أنت لو بصيت لرجليك تقع.. وعجبي".. جمل إذاعية ما زالت في وجدان كثيرين من عشّاق الإذاعة المصرية على مدار تاريخها، جمل مرتبطة بصوت البشاشة والمرح، صوت السيدة التي خُلق لأجلها الميكروفون، الإذاعية الكبيرة إيناس جوهر، التي فتحت قلبها إلى "التحرير" في حديث مطوّل، بمناسبة يوم الإذاعة العالمي، واشترطت علينا بخفة ظلها المعتادة أن يكون الحديث في موضوعات مختلفة، وحاولنا تحقيق ذلك انطلاقًا من فكرة برنامجها السابق "أول مرة"، التي يعتمد على الأسئلة السريعة.
بتعملي إيه في حياتك حاليًا؟ بنام.. باخد قسط من الراحة اللي كنت مفتقداه طول عمري قبل المعاش.. أدرس في أكاديمية "دهب" اللي عندي بالدنيا.. بسافر أغيّر جو قدّر الإمكان.. إلى جانب سهرتي الأسبوعية في الشرق الأوسط "إيناس والناس". أول برنامج قدمتيه؟ "بصبح عليك" على الشرق الأوسط في 1972، كانت بتقدّمه علا بركات،
بتعملي إيه في حياتك حاليًا؟
بنام.. باخد قسط من الراحة اللي كنت مفتقداه طول عمري قبل المعاش.. أدرس في أكاديمية "دهب" اللي عندي بالدنيا.. بسافر أغيّر جو قدّر الإمكان.. إلى جانب سهرتي الأسبوعية في الشرق الأوسط "إيناس والناس".
أول برنامج قدمتيه؟
"بصبح عليك" على الشرق الأوسط في 1972، كانت بتقدّمه علا بركات، وكانت مسافرة مع زوجها إبراهيم نافع، الله يرحمه، ولمّا سافرت دوروا على حد صوته بشوش وضحوك زيّها، فجابوني أقدّم مكانها، وقبلها كنت قارئة نشرة.
أول أجر تقاضيته؟
16 جنيهًا في الإذاعة، وأول مرة أقرأ نشرة في التليفزيون أخذت 173 جنيهًا.
أفضل برنامج قدّمتيه؟
"إيناس والناس".. ده آخر برنامج ليّا، باقدّمه من سنة على الشرق الأوسط، وهو الأفضل لأنه منوّع سياسة واقتصاد وفن وطبيخ ورياضة، وبيغطي كل اهتمامات الناس، برنامج "تسالي" هو الأشهر والأنجح، لكن "إيناس والناس" فيه كل حاجة.
أصعب نقد تعرضت إليه؟
كان نقدا يميل إلى قلة الأدب والسفالة، وكان من الأستاذ خيري شلبي في مجلة الإذاعة والتليفزيون، كنت بعمل برنامج اسمه "رسائل ملونة"، وبقول على الهواء: "أحمر.. أخضر.. أزرق"، فراح كتب: "اللي يسمعها يحس إنه بيقلع هدومه"، وده نقد قليل الأدب، ورفعت عليهم قضية وقدمولي اعتذار رسمي.
بتحب إيه في الراجل؟
إخلاصه.
أول حب؟
الله يرحمه.
أول غلطة في حياتك؟
بعد كل ما وصلت إليه؟
أي نعم.. لسه عايزة أسافر وأتفسح، وقلبي يقف مع بداية الطيران، وأتشاهد لحظة الهبوط، ده ألذ حاجة بالنسبة لي. أنا وصلت لحاجات كتير والحمد لله، لكن لو كنت اشتغلت مضيفة كان زماني كبيرة المضيفات ولا وزيرة الطيران.
أكتر مطرب قديم كنت بتسمعيه؟
محمد عبد الوهاب.. حبيته أوي وكان غناه جميل، وبعده عبد الحليم حافظ.
ومن الحاليين؟
مدحت صالح.
بتحب المهرجانات الشعبية؟
لا خالص.. أعوذ بالله.
والممثل الأفضل بالنسبة لكِ؟
نور الشريف، وزكي رستم، وحسين رياض، ومن الستات هند رستم، وبعدها شادية وصباح.
وحاليًا؟
مش بشوف أوي، لكن خفة دم كريم عبد العزيز تفوق الحد، وباحب أحمد السقا، ومن الستات باحب غادة عادل.
أول وآخر فيلم دخلتيه السينما؟
أول: "شارع الحب" و"البنات والصيف" لعبد الحليم حافظ. آخر: "نادي الرجال السري" لكريم عبد العزيز وماجد الكدواني اللي بقى ممثل جامد أوي.
أول وآخر كتاب قرأتيه؟
الأول مجموعة إحسان عبد القدوس.. ومؤخرًا قرأت "موسم صيد الغزلان" لأحمد مراد.
أول "علقة" أخدتيها في حياتك؟
المرة الوحيدة اللي زوغت فيها من المدرسة وأنا في الثانوي، صحابي قالولي نروح السينما، وبالصدفة يحصل في بيتنا ظرف وأبويا يروح ياخدني من المدرسة، وأول ما دخلت البيت أخدت "بونية" زحفتني لآخر صالة البيت، وبقوله في إيه اداني "قلم" وراها.
بتحب تاكلي إيه؟
طاجن العكاوي، وشوربة العدس، وماعرفش آكل من غير أرز، واتحرمت من حاجات بسبب السكر، لكن لما ظبطه رجعت أكل كل اللي أنا عايزه.
أكتر حاجة ضاعت منك ووجعتك؟
رحيل أمي.
أول حاجة بتيجي في بالك لما تفتكريها؟
لما مات أبويا ومسكت هي مصروف البيت، أول حاجة عملتها إنها دبرت حالها وجابتلي عربية، وقالتلي: ماينفعش تفضلي رايحة جاية في المواصلات من غير عربية. دي من اللحظات اللي بفتكرها دايمًا بقول كتر خيرها ركبتني عربية. وتاني حاجة لما بفتكر جمال كل فستان كانت بتعملهولي.
إيه اللي بيبكيك حاليًا؟
إيه اللي بيخليك تكملي الحياة وانت مرتاحة البال؟
تشغيل العقل.. مش التنفيض.. العقل بيزودك صلابة.
تحبي تقولي إيه ل: بابا شارو، آمال فهمي، سناء منصور، طاهر أبو زيد، نجوى إبراهيم؟
بابا شارو: أستاذ الأساتذة وأستاذ الإذاعيين، في الامتحان حاولت المزاح معه فدخلت الإذاعة، كان بيعايب على حروفي، فتطاولت وعايبت على حروفه. آمال فهمي: أستاذة عظيمة تعلمت منها الكثير في فن الحوار. سناء منصور: تعلمت منها الكثير عن فنون المنوعات، هي كانت على طول مبدعة. طاهر أبو زيد: هو اللي عمل إيناس جوهر الإذاعية. نجوى إبراهيم: ربنا يبارك في جمالك طول العمر.
تتلمذت على يد من؟
أميمة عبد العزيز، سناء منصور، طاهر أبو زيد، ومديحة نجيب.
أفضل حوار أجريته في مشوارك؟
كان مع عمار الشريعي.
في مرة كنت هتقعدي في البيت؟
أه اتوقفت مرة بسبب آمال فهمي، وراحت قالت: المحروسة إيناس جوهر بتعمل ما يطلبه المستمعون وفي تعديل وزاري وبتذيع أغنية "الصبر والإيمان". شالوني من على الهواء، وتاني يوم ممدوح سالم رئيس الوزراء رجعني بعد ما روحت اشتكيتله، قالهم يعني إيه توقفوا حد من غير تحقيق.
أخف دم ضيف قعد قدّامك؟
رشدي أباظة.. كان شربات خالص ورجل جميل.
"أرزل" حد قعد قدامك؟
غيرك! (تضحك وتقول: برفع من روحك المعنوية).. أنا أساسًا مابقعدش قدام حد رزل وبختار ضيوفي كويس.
أكتر كلمة إعجاب فاكراها؟
يوسف السباعي مرة قالي: كل امرأة تُحرك حاسة واحدة، انتي صوتك يُحرك الخمس حواس. ومرة مفيد فوزي كتب: الميكروفون اتخلق لإيناس جوهر. ومرة أنيس منصور كتب عن العظماء في مصر، وقال: وفي الراديو إيناس جوهر. دول 3 جمل مش بنساهم في حياتي.
لو قابلت السيسي تقوليله إيه؟
زي ما رحمت سكان العشوائيات، أرجوك ارحم سكان القبور وشوفلهم هما كمان سكن بدل ما يكملوا حياتهم مع الميتين.
تحب تقولي حاجة عن الرئيس السيسي؟
يكفي إن الإخوان رحلوا عن مصر بيده وفكره وعقليته واتزانه في 30 يونيو، وأنا أوافق جدًا على تسمية السيسي ب"عزيز مصر".
وماذا عن ثورة 25 يناير؟
يناير إيه؟ يناير مش ثورة، دي خيبة أمل، مش ثورة خالص ومش معترفة بها رغم إن ناس كتير معترفين بها بمن فيهم الرئيس السيسي، وبيقول دايمًا إنه بيزعل لما حد يعيب في هذه الثورة، لكن أنا بقوله ماعلش يا ريس سامحني، أنا مش قابلاها، ومكنش لها لازمة، الراجل قال هقعد 6 شهور وهمشي بدل الفوضى، وكان هيمشي، وأنا لا أتصور إن كان في حاجة اسمها توريث.
وللحديث بقية في الجزء الثاني من الحوار.