بالصوت.. أبلة فضيلة في حوار ل "فيتو": أم كلثوم ماكانتش بتحب أي راجل من اللي حولها

* كوكب الشرق قالت لي: "أنا جايبه الدكتور الحفناوي في البيت علشان يلحقني لما أتعب».
* أم كلثوم رفضت اللقاء الإذاعي وقالت: «أنا لما أقف قدام الميكرفون لازم أغني»
* أحسن جائزة لما الأطفال يحبوكي لأنهم ما بيكدبوش
* «صفية المهندس»علمتني إزاي أقعد أمام الميكرفون
* أول مرتب كان 12 جنيها وفرقت نصفه على الغلابة
* المصريون أعظم ما أنجبت البشرية بس "ولاد لذينة"
«أبلة فضيلة» أشهر من قدم برامج الأطفال في الإذاعة المصرية.. اسمها الحقيقي فضيلة توفيق، خريجة كلية الحقوق وتتلمذت على يد السيدة «صفية المهندس» وزوجها الإذاعي القدير «بابا شارو». حصلت على ليسانس الحقوق، جامعة القاهرة 1951، وشغلت منصب مقدمة برامج إذاعية للأطفال منذ 1960 حتى الآن، ثم منصب مدير عام البرامج الإذاعية للأطفال في الإذاعة المصرية في الفترة من 1970-1980، كما حصلت على وسام الاستحقاق من رئيس الجمهورية تقديرا لعطائها.. في عام 2007 توفي زوجها المهندس إبراهيم أبو سريع علي وكيل أول وزارة الإعلام سابقا.
في الميعاد المحدد ذهبت إلى زيارتها في منزلها وفتحت هي الباب، وبالرغم من مرضها وارتفاع درجة حرارتها وعدم وجود أحد معها بالمنزل إلا أنها رحبت بي وزميلتي المصورة هدير على الفور، وجلسنا في «الريسبشن» المليىء بالذكريات والصور.
وبعد أن قدمت لنا حق الضيافة، ورحبت بنا، بدأنا حديثا من القلب.
*من أسماك فضيلة؟
أبويا كان صوته رقيق قوي ومامتي اللي أسمتني فضيلة على اسم مامتها، لكن بابا ماكانش حابب الاسم؛ لأنه كان بيقول حرف "الضاد" حرف ضخم فكان بيقولي يا "لي لا".
*إيه حكايتك مع الحواديت؟
جدي وإحنا صغيرين، كان بيجمعنا يحكي لنا حواديت عن الرسول صلى الله عليه وسلم، فكنت بجمع العيال جيرانا، ونقعد على سلم العمارة واحكلهم حواديت جدى،وهما كانوا بيقعدوا ساكتين بالساعات يسمعونى.
*وبدايتك مع الإذاعة؟
أنا كنت في روضة أطفال العباسية وكنت متفوقة في كل المجالات وخاصة في الرياضة والفن والتمثيل وكنت جريئة ويمكن ده اللى طلعها في دماغى اشتغل في الإذاعة، ولما كنت في الروضة،كانت الإذاعة في بدايتها وانا كنت بتقمص دور المذيعة وكان صوتى حلو ولبقة وكنت بقدم كل حفلات المدرسة،والحكاية كبرت معايا بالرغم أنه في التوقيت ده مكنش في مذيعات ستات.
ولما وصلت الثانوى كانت أول مذيعة ست هي مدام صفية المهندس، فجبت نمرتها واتصلت بها وقلتها انا عاوزة ابقى مذيعة،فقالتلى انتى صوتك حلو وهتنفعى، ودعتنى لزيارتها في بيتها بالعباسية وانا كنت ساكنة في شارع رمسيس يعنى جيران،ولما رحت لها البيت قابلت عندها اخوها الأستاذ فؤاد المهندس وقمت بإجراء حوار مع الإثنين كإنى مذيعة وهى قالت انتى هتنفعى تبقى مذيعة بس لما تكبرى شوية وهى شجعتنى، وكانت ست ظريفة قوى واتصلت بها يوم عيد ميلادى فجاءت إلى منزلنا لتهنئتى وبصحبتها ابنائها الذكور فلم يكن لديها بنات،وهى من شجعتنى ونصحتنى أن ادخل كلية الاداب فقلت لها أن رغبة ابى أن التحق بكلية الحقوق مع اخويا لأن اخويا كان عاوز يبقى محامى وبابا قالى لو عاوزه تتعلمى ادخلى كلية الحقوق مع اخوكى وبالفعل دخلت كلية الحقوق.
*وبعد تخرجك من كلية الحقوق عملتي إيه؟
كنت بتمرن محامية في مكتب استاذى في كلية الحقوق الدكتور حامد باشا زكى وكان وزيرا للاقتصاد وقتها، بس كنت بطفش الزبائن مرة لقيت بنت جاية بترفع قضية على ابوها،قولتلها: ازاى تشتكى ابوكى؟ روحى وعيب كده، فمشيت.
لكن حد من الزملاء في المكتب فتنوا عليا وقالوا لحامد باشا زكى،فقالى حد يطفش الزباين؟ قلت له ازاى واحدة تشتكى ابوها قال: احنا شغلتنا كده تشتكى ابوها ولا امها احنا مالنا، فقالى انتى متنفعيش محامية، وهو كان عارف ولعى بالإذاعة وعلاقتى بالسيدة صفية المهندس فقالى:تروحى الإذاعة؟ قولتله طبعا وكلم صفية المهندس وقالها هبعتلك بنتك تعينيها في الإذاعة وتدريبها وقد كان.
*فاكرة أول برنامج قدمتيه في الراديو؟
أول برنامج عملته كان باسم «س،ج»وكان سياسي بقابل المسئولون والمشاهير واسئلهم أسئلة بتدور في اذهان المستمعين وكان أول حلقة مع وزير الاقتصاد حامد باشا زكى.
*أول مرتب قبضتيه كان كام؟ وعملتي به إيه؟
أول مرتب أخدته كان 12 جنيه وكان مبلغ كبير لاننا كنا في الإذاعة كان مرتب يعادل القطاع الخاص وفرقت نصفه على الغلابة والنص الثانى جبت شيكولاته وحلويات.
*من أشهر الفنانين اللي عملتي معاهم لقاءات؟
أهمهم السيدة «أم كلثوم» ولما ذهبت لمقابلتها رفضت إجراء اللقاء وقالت لى "انا حبيتك بس أنا أم كلثوم لما يتحط الميكرفون قصادى اغنى" فقلت لها: طب غنى،وفعلا غنت وانا قدمتها كانها في حفلة وهى كانت مبسوطة جدا منى.
*هل استمرت علاقتك بالسيدة «أم كلثوم»؟
بعد اللقاء الإذاعي ده أخدت نمرة تليفونى لانى قلتها انا مقدرش اتصل بيكى ممكن تكونى مضايقة أو مش في الموود فقالتلى خلاص هاتى تليفونك أنا هطلبك وكانت فعلا بتتصل بيا،ولما كانت بتيجى مبنى الإذاعة تقول لمدير الإذاعة "ناديلى البت بتاعة الإذاعة" لانى كنت بدأت اقدم برنامج أطفال مع «بابا شارو»، وتفضل مسكانى في ايدها ومدير الإذاعة كان بيخرج ويسيب مكتبه بناءً على طلبها علشان نعرف نقعد نتكلم مع بعض، قولتها مرة ده بعد كده هيرفدنى قالتلى يقدر؟ ده انا ارفده.
حتى مدير الإذاعة خاف وقالى خلى بالك لحسن بيقولوا عليها «بتاعة ستات» قولتله يا فندم ابدا هي بتحبنى زى بنتها، لكن طبعا اعداء النجاح كانوا كتير وبيغيروا منها علشان كده طلعوا عليها الاشاعات دى، وكنت بكلمها في مرة وقولتها بجد انتى بتاعة ستات زى ما بيقولوا عليكى ؟ قالتلى يا هبلة في حد يقول لواحدة في مكانتى الكلام ده بس كانت مبسوطة منى لانى بتكلم معاها ببساطة.
*احكيلي موقف متقدريش تنسيه حصل بينك وبين الست «أم كلثوم»؟
في مرة حصلت حاجة ظريفة وانا قاعدة في القطار لطريقى للاسكندربة،فبصيت ادامى فقلت لنفسى "القفا ده انا عارفاه" فخبطت على كتفها فلفت برأسها فلما لاقتنى قالتلى ايه يا بت ؟قولتلها اصل انا قولت القفا ده انا عارفاه.
قالتلى ايه يا قليلة الادب انا قفا، قولتها لا سورى اصل الشنيون بتاعك انا عارفاه وهى كان معاها الوصيفة بتاعتها فقالتلها إقعدى ورا مكانها وانا قعدت جنبها.
*هل دار حديث بينكم عن حياتها الشخصية؟
مرة سألتها انتى بتحبى الدكتور الحفناوى؟ قالتلى «ده كلب في البيت،انا جايباه علشان يلحقنى لما اتعب»،وهى ماكانتش بتحب أي راجل من اللى نحوها.
*وإيه علاقتها بالفنانين؟
ماكنتش بتحب موسيقار الاجيال محمد عبد الوهاب،وكان هو عاوز يتجوزنى وطلعت اشاعة اننا هنتجوز فقالتلى «اوعى يابت تتجوزيه،ده إبن كلب».
*إيه حكاية جوازك من محمد عبد الوهاب؟
قصتى مع عبد الوهاب بدأت في الإذاعة برضوا من خلال نفس البرنامج "س وج " وقابلته في الإذاعة وقلت له عاوزة اعمل معاك لقاء في البرنامج فوافق وقالى تعالى البيت، وبالفعل اخدت مهندس الصوت والفنيين والأجهزة وروحنا البيت وهما طلعوا قبل منى اتخض لأنه كان قصده انى اقابله في بيته لوحدى مش يقصد اننا نعمل لقاء،خاصة أنه كان لا يسمح لاحد بزيارته في بيته، لكن بالفعل تم اللقاء وسجلنا الحلقة.
*إيه أهم سؤال حرصتي على توجيهه له؟
ليه الستات بتحبك؟ قالى:«علشان استاهل اتحب»،فقلت له:تستاهل تتحب ليه؟ قالى: «لانى محمد عبد الوهاب» قولته: انت فاهم انك مهم، ام كلثوم أهم منك والناس بتحبها أكثر منك لانك متعالى على الناس لكن هي بتعمل حفلة كل شهر، فقالى:«طب انتى بتحبى مين أكتر؟» قولتله طبعا أم كلثوم امال هحبك انت.
*وإيه كان رد فعله؟
حبنى علشان بساطتى وتلقائيتى، وكتبت الصحف والمجلات وقتها،محمد عبد الوهاب يتزوج المذيعة "فضيلة توفيق".
*وده كان حقيقي كنتوا هتتجوزوا؟
لا طبعا، دى كانت اشاعة،لكن زوجته "إقبال نصار" غارت منى وكان وزير "الارشاد القومى" أو الإعلام وقتها صلاح سالم وهى كانت صديقته وطلبت منه رفدى وهو قال لمدير مكتبه "محمد أبو نار" شوف موضوع البنت اللى هتتجوز عبد الوهاب دى، فلما سألنى أبونار قلت له لا طبعا ده أد ابويا وراجل متجوز وانا مبحبهوش فاقتنع بكلامى وأوضح لصلاح سالم انى مش بفكر فيه وهو اللى بيجرى ورايا علشان يتجوزنى وانا مش موافقة.
*وإزاي اتنقلت من برنامج سياسي لبرامج الأطفال؟
كنت بتدرب مع بابا شارو في برنامج "حديث الأطفال" وكنت انا اللى بقدم الحدوته اللى في البرنامج، لحد ما فتح التليفزيون وساب بابا شارو الإذاعة توجه للتليفزيون،وكانت هنا فرصة حقيقية ليا وقدمت انا البرنامج وبعدين جت فكرة برنامج "غنوة وحدوته".
*كيف كانت حياتك مع زوجك رحمه الله؟
بالرغم من شدته مع الموظفين الا أنه كان حنين جدا معايا وكنت لما امرض يقعد تحت رجلى ويعيط،وكنت بحبه قوى وهو كمان كان بيحبنى.
وكان دائما يقولى "اوعى تموتى قبل منى، انا مقدرش اعيش من غيرك لكن انتى هتقدرى تعيشى من غيرى " وفى عام 2007 اشتد عليه المرض وتوفى، وكان يوم صعب عليا.
*أبلة فضيلة لسه مستمرة في تقديم الحواديت؟
آه طبعا لسه بروح الإذاعة بقدم برنامجى وامشى وبالمناسبة انا مش باخد فلوس في مقابل ده، لانى طلعت معاش من بدرى، لكن انا بحس انى لسه قادرة على العطاء وانى لسه موجودة.
*هل في فرق بين الأطفال زمان والأطفال دلوقت؟
الأولاد دلوقت أكثر ذكاءا من ولاد زمان، العيال دلوقت مفتحين، بس هما دلوقت أكثر جرأة وقلة ادب مش متربيين،زمان كنا مؤدبين يعنى،لما "بابا" يخش علينا كلنا نقف لغاية هو يقعد على السفره نقعد بعده وعلى طول نقول حضرتك.
*أحسن جائزة أو تقدير حصلتي عليه؟
أحلى حاجة انك تحسى أن الأطفال بيحبوكى،اصل الأطفال ميكذبوش،يعنى يقولولك ما بنحبش فلان،نقولهم يا ولاد عيب كده،ميصحش،لكن عندهم الصراحة دى فبيحبونى من قلبهم لانهم بيحسوا باللى بيحبهم وانا بحبهم جدا.
*أصعب موقف مر عليكِ؟
أمى لما ماتت حسيت أن الطيبة والخير هيموتوا معاها،فهى كانت ست طيبة قوى قوى،عمرها ما زعلت حد،وهى الست ده في الجنة اكيد معندهاش كبر في نفسها ابدا وكانت بتقول للزبال "حضرتك" وبعدين تقولك ربنا خلقنا كلنا زى بعض بس خلق ده طباخ ودى شغالة بس هما بينفعوا الناس اكتر مننا لانهم بيخدمونا.
*ما فكرتيش في الهجرة لكندا علشان تعيشى مع بنتك وأحفادك؟
لا اصل انا بحب مصر قوى، وريم كانت في زيارتى ولسه مسافرة من أيام والمرة دى وهى ماشية قالتلى يا مامى حرام عليكى بقى كفاية إذاعة وتعالى اقعدى معايا،قولتها انا بحب الإذاعة وهما في الإذاعة مش عاوزين يسيبونى وانا ماباخدش فلوس لكن بحس انى لسه موجودة وقادرة على العطاء.
وعارفة انا قعدت معاها السنة اللى فاتت 3 شهور بس في الاخر قعدت اعيط زى العيال الصغيرين قالتلى بتعطيى ليه؟قولتلها عاوزة اروح،قالتلى خلاص هخليكى ترجعى مصر.
*تدعي لمصر بإيه؟
احب مصر تبقى عالية فوق دائما،انا لما بشوف العلم بعيط.
*وتقولي إيه عن المصريين؟
بحب المصريين وبحس انهم اعظم ما انجبت البشرية مع انهم "ولاد لذينه"،يعنى لما تسافرى أي بلد بتلاقى الناس بره متربية عننا،وانا بزعل لاننا كل مدى بنبقى اوحش إنما يعنى ممكن نتصلح.