مرتضى للخطيب: أنت اتكشفت.. وأنا عاذرك لأنك دبلوم صنايع (فيديو)

واصل مرتضى منصور، رئيس نادي الزمالك، هجومه على اللجنة الأوليمبية برئاسة هشام حطب، ومحمود الخطيب، رئيس النادي الأهلي، قائلًا: «أنا هوريكوا أنتم الاتنين، عشان أنتم بتهرجوا والمصحف».
وتحدث مرتضى خلال تصريحات للموقع الرسمي لنادي الزمالك، معلقًا: «أنت اتكشفت يا خطيب، وأنا طبعًا عاذرك عشان أنت معاك دبلوم صنايع، ودخلت معهد التعاون اللي بيدخلوا كل الفاشلين بتوع الكورة اللي مدخلوش كلية، وأنا بعتبرك معاك ثانوية صناعية، وده مش عيب، أنت ربنا إدالك موهبة في الكورة وأنا من المعجبين بيك على فكرة».
وواصل رئيس القلعة البيضاء، «أحد البرامج على أحد القنوات، يقدمه الحمار والجحش، فرحانين بأن اللجنة الأوليمبية اعتمدت اللائحة بتاعتهم، لازم يفهموا إن اللجنة دي ليس لها اختصاص بالجمعيات العمومية للأندية، بيني وبينكم القانون».
واستمر في حديثه: «اللجنة الأوليمبية رايحين للجنة الأوليمبية الدولية اللي هي متبرأة منهم لأنها تتحدث عن اتحادات، وبتتكلم عن الفساد، وأنت فيه مكالمة بتقول إنك مرتشي يا هشام يا حطب، ما ترد على الكلام اللي أنا بقوله ده».
وصرح منصور بأن لائحة النادي الأهلي الجديدة بها بنود غريبة مثل وضع مجلس الإدارة سلطته على الانتخابات داخل النادي، واختيار المستبعدين وفقًا للأهواء، وقال: «الخطيب عايز يغيظني عشان عجبته فكرة كيد النساء وتعاون مع اللجنة الأولمبية».
وتابع: «القصة مش فرد عضلات، القصة متعلقة بالقانون، بس أنا عايز دكر بشنب يطلع يقولي ما بتفهمش في القانون، لكن دول عملوا إيه، قالوا شكلنا لجنة وطلع الكلام كله فشنك».
وأعرب منصور عن سعادته، قائلًا: «أنا فرحان لأن هشام حطب، رئيس اللجنة الأوليمبية مش قادر عليا»، معلقًا: «الجمعية العمومية للزمالك أذاعت تسجيلا صوتيا لمصطفى عبدالخالق وأحمد سليمان اللي هما صحاب هشام حطب، وقالوا إنه أخد رشوة من هاني العتال، المفروض يرد عليهم ولا يرد عليا أنا؟».