أحمد مكي يكشف سر غيابه الطويل: «كان عندي فيروس ضربلي الكبد والطحال»

بعد فترة غياب كبيرة عن الساحة الفنية، استمرت 5 أعوام سينمائيًا، وعامين على الشاشة الصغيرة، قرر النجم أحمد مكي الكشف عن سبب هذا الغياب لأول مرة.
وقال "مكي" عبر صفحته الرسمية على "فيسبوك": "بقالي سنة تقريبًا عيان جدًا، كان عندي فيروس ضربلي الكبد والطحال، مكنتش حتى أقدر أشرب بق مية بسبب الطحال، وكنت في شبه كومة أول شهرين من المرض، عشان الكبد كان عملي خمول، كنت بأنام من 18 ل20 ساعة في اليوم".
وأضاف: "خسيت فوق ال30 كيلو وكنت شبه فاقد للأمل، الحمد لله على كل حال، أنا دلوقتي خفيت تمامًا ووزني زاد تاني، واتعلمت كتير جدًا في الرحلة دي، وكان فارق معايا جدًا سؤالكم عني، حسيت إن ليا أهل مش جمهور، وإني فرقت معاهم لما غبت، ربنا يفرح قلوبكم زي ما فرحتوا قلبي، وأهلًا بيكم في صفحتي".
أما عن إنشائه صحفة على "فيسبوك" برغم إعلانه أكثر من مرة أنه لا يحب هذا الأمر، قال "مكي": "اللي خلاني أعمل الصفحة دي إني لقيت كم ناس سألت عليا لما غبت السنه اللي فاتت و بيستفسروا أنا اختفيت فين، وكنت حابب أشكرهم على سؤالهم عليا لأنه فعلًا فرق معايا نفسيا وكنت محتاجه أوي".
يذكر أن آخر أعمال أحمد مكي السينمائية كان فيلم "سمير أبو النيل" عام 2013، بينما كانت آخر أعماله التلفزيونية مسلسل "الكبير أوي" الجزء الخامس والذي تم عرضه في رمضان 2015.
ويشارك "مكي" في الموسم الرمضاني القادم، بمسلسل كوميدي جديد وهو "خلصانة بشياكة"، والذي يشاركه بطولته النجمين هشام ماجد وشيكو.