أحمد موسى يهاجم باسم مرسي: «جزار مش لاعب كورة.. ولا يصلح لفريق شطورة الرياضي»

هنأ الإعلامي أحمد موسى، نادي الزمالك، لحصوله على بطولة كأس مصر، بعد فوزه على النادي الأهلي، مساء أمس الإثنين، بنتيجة 3 أهداف مقابل هدف؛ قائلًا: «مبروك للزمالك، وأول ما خلص الماتش بعت رسالة للمستشار مرتضى منصور قولتله مبروك الكأس ونتقابل في السوبر».
أضاف موسى، خلال تقديمه برنامج «على مسئوليتي»، عبر فضائية «صدى البلد»، «الأهلي كان أفضل من الزمالك، ولاعيبتنا كانوا كويسين، لكن الزمالك كسب، الحظ، ودي الكورة، وإحنا بصراحة مش بنحب الكأس، لكن الدوري والسوبر بتوعنا، وكذلك بطولة إفريقيا، وبلاش تنسوا إننا واخدين 21 بطولة في 9 سنين».
وهاجم موسى مهاجم الأبيض «باسم مرسي»، قائلًا: «باسم مرسي إمبارح كان لازم يطرد من أول 5 دقائق، أسوأ حكم من أول ما عرفت حاجة اسمها كورة، حكامنا برقبته، باسم ده لاعب كورة ولا في محل جزارة؟ دي كورة دي؟ ويا سعد سمير إنت بطل إنك كملت الماتش مع إنك كنت لازم تخرج، وأوعى تقبل اعتذاره، ده ضربك بسكينة في وشك، كان قاصد يخرجك بره الماتش وبس».
تابع: «باسم مرسي أصلًا مش لاعب كورة، لو أنا بدرب فريق شطورة الرياضي مش هاخد باسم مرسي، ومصطفى فتحي برقبته، على الأقل محترم، بكل صراحة ده لاعب لا يستحق التواجد في نادي الزمالك المحترم، إنت كنت بتلاعب الأهلي مش فريق عدو ولا حاجة، سيبقى في الذاكرة هذه اللقطة الوقحة التي قمت بها».
وأحرز باسم مرسي هدفي الزمالك الأول والثاني، ثم أحرز عبد الله السعيد للأهلي من ركلة جزاء، بينما أضاف مصطفى فتحي الثالث للزمالك، لينتهي اللقاء بحصول الأبيض على بطولة كأس مصر للمرة الرابعة على التوالي.