عمرو أديب والزمالك.. 8 أعوام "قهر ووجع" وعامان "كيد وشماتة"

"أنا موجوع.. مفيش فايدة.. شعري راح.. مش هنتغير.. الآي فون ظهر وصاحبه مات واحنا لسة ما بنكسبش الأهلي.. تعيش وتفتكر".. تلك التعليقات الساخرة الممزوجة بالحسرة والألم اعتاد عليها المشاهد من الإعلامي الزملكاوي شديدالانتماء عمرو أديب، عقب كل مباراة بين الأهلي والزمالك تُحسم لصالح الأول، وعلى مدار 10 سنوات منذ عام 2009 وحتى عام 2016، تعليقاته لم تختلف سوى عامين، حين غمرته السعادة بشدة بعد تعادل الزمالك في 2010، وفوزه في 2015.
الأهلي والزمالك عام 2009
انتهى الدوري المصري الممتاز بفوز النادي الأهلي، وعلق أديب ساخرا، في حلقة جمعته مع الفنان عزت أبوعوف، المعروف بتعصبه للنادي الزمالك أيضا، "الشورت الإسود كان كابس من تحت.. إنت عارف الحزن في القلب مش فى الشورت"، فرد عزت أبوعوف: "أنا متضايق يا عمرو.. ليه يتعمل فينا كدة"، فأجاب أديب: "أنا موجوع.. تعيش وتفتكر يعنى هى دي أول مرة.. في هذا الموقف انا قلت شعر: "مفيش حاجة بتتغير الامة العربية ما بتتوحدش العدوان الاسرائيلي ما بيرحمش الانابيب ما بتتوفرش نادي الزمالك ما بيكسبش.. مفيش حاجة بتتغير"، الدنيا كل يوم هي هي، هو مش امبارح إسرائيل بتضرب غزة وفلسطينيين بيموتوا النهاردة ايه؟ هي هي.. الدنيا ما بتتغيرش إحنا شعوب متوقفة.. إحنا شعوب مفيش فايدة فيها".
الأهلي والزمالك 2010
تعادل الناديان في الدوري المصري 3-3 في مباراة الذهاب، ثم فاز الأهلي في كأس مصر 3-1، هذا التعادل جعل الأمل والسعادة يدب في نفس أديب على الهواء، فقال له الإعلامي أحمد موسى، الأهلاوي المتعصب "طلعلكم صوت.. ظهروا الزملكاوية دول كانوا بيخافوا يعملوا مداخلات"، وبسعادة شديدة قال أديب: "تحية لمجلس إدارة نادي الزمالك اللي عملوا الفرقة دي ووفروا له الوقت إنهم يكونوا كويسين.. البلد دي فيها حاجات كتير غلط وآن الآوان إنها تتصلح، منها الموضوع ده، مصر عمرها ما هتفضل كدة أبدا.. شوف الإضرابات، شوف العمال، شوف الزمالك".
الأهلي والزمالك 2011
فاز الأهلي بالدوري في يونيو عام 2011، وأعرب الإعلامي عمرو أديب، حينها، عن استيائه من الخسائر المتكررة لنادي الزمالك، قائلا: "إدارة النادي الأهلي تستحق التهنئة على دورها الجيد في الأداء المتميز"، لافتا إلى أنه لم يفرح بفوز الزمالك بسبب نكد الأهلي المستمر له.
الأهلي والزمالك 2012
ألغيت القمة في هذا العام لدواعٍ أمنية.
الأهلي والزمالك 2013
لم يفوّت الإعلامي عمرو أديب مقدم برنامج "القاهرة اليوم" في ظل الأجواء السياسية الساخنة أن يسخر من نادي الزمالك وإدارته الفنية على مدار السنين الماضية، وإخفاقه في البطولات، ولا سيما بعد فوز الأهلي في دوري أبطال إفريقيا.
واعتبر أديب أن تولي مسؤولية نادي الزمالك كمدير فني من الأعمال السهلة والمضمون فيها المركز الثاني، وأيضا حصد الدولارات بلا تعب، فهو تعود على هذا المركز دائما، واستكمل: "زي مانا دايما بأطالب إني أكون مدرب نادي الزمالك هجيبله المركز التاني دايما وأخد الدولارات بتاعة المدرب عادي جدا".
الأهلي والزمالك 2014
انفعل الإعلامى عمرو أديب بعد فوز الأهلى على الزمالك في كأس السوبر بضربات الترجيح، في المباراة التى أقيمت بينهما على استاد القاهرة؛ والحصول على لقب السوبر، قائلاً: "إحنا جايبين ناس كلهم جداد لانج.. أنا مش عارف ولا واحد منهم.. الزمالك ما عملش حاجه وأنا متعود، وكمية الذبحات والجلطات اللي بتحصلى أنا متعود عليها"، واستكمل "حصلت ثورتين فى مصر والزمالك لسه بيتهزم من الأهلى، وأنا شعرى راح بسبب الزمالك والقُصة طارت، والزمالك لم يهزم الأهلى.. ماذا يحدث؟.. مفيش فريق فى العالم بيخسر على طول مبارك يمشى والزمالك فى المركز الثانى ييجي المجلس العسكرى وبرضه فى المركز الثانى، والسيسي جه وبرضه هنبقى فى المركز الثاني".
الأهلي والزمالك 2015
يعتبر هذا العام، هو عام السعادة بالنسبة للإعلامي عمرو أديب، بعد فوز الزمالك على النادي الأهلي بكأس مصر، وقد أجرى "أديب" مداخلة مع الكابتن أحمد شوبير على فضائية "صدى البلد"، وبسعادة غابت عنه عدة أعوام قال: "إحنا كل أسبوع الأعياد عندنا ممتدة"، وعلى غير العادة كان "شوبير" بوجه عابس قائلا: "إحنا معانا الدوري 12 سنة.. والله وصوتك طلع"، فرد أديب بسعادة يغلبها كيد ساخر: "هنقعد بقى إحنا اللى بنينا الهرم وإحنا اللي عندنا حضارة 7000 سنة، كلمنى عن النهاردة.. ما تبطلوا بقى حركات المصريين دي، قول لي مبروك يا عمرو ولعبتوا حلو وفرقة كويسة".
واستكمل أديب: "إنت مش مقدر يا أحمد إحنا الشعب الرملكاوى ده كان تايه وفجأة لقى طريقه، ده الجيل الجديد.. 10 سنين جاية من ده كتير، أنا كان عندى إحباط مزدوج دلوقتى أنا هعيش أمجادى، أنا بعيش شبابي اللي راح، إحنا من 10 سنين ماكسبناش الأهلى، من قبل الآيفون.. إنا خلاص هقدم برامج رياضية مش هسيبها للأهلاوية بس"، وعن شعار "الزمالك قادم" قال "الزمالك جه مش جاي لسة.. الزمالك انتصر وارتفع".
الأهلي والزمالك 2016
هنأ الإعلامي عمرو أديب، النادي الأهلي بالفوز على الزمالك بهدفين نظيفين أحرزهما ماليك إيفونا وعمرو جمال، في مباراة القمة 111 التي أقيمت الثلاثاء 9 فبراير على ملعب ستاد برج العرب.
وقال أديب، خلال برنامجه "القاهرة اليوم"، على قناة "اليوم"، إن مباراة اليوم من أسوأ المباريات التي لعبها الزمالك منذ بداية الموسم الحالي، مضيفًا: "الزمالك ملعبش أسوأ من النهاردة، عمرنا ما كنا بهذا السوء، من أول ما مشي فيريرا وإحنا زي الزفت".
وأضاف الإعلامي: "عاوزين نعمل هاشتاج إحنا غلطنا في حقك يا فيريرا، ده لاعيبة الزمالك النهاردة مكنش لاقية نفسها في الماتش خالص، رغم إننا كنا بنقابل فريق ¾ كيانها مش موجود".
واختتم كلامه بإن "الفوز يأتي بالعمل الجاد والقوة والعرق وليس أعمال والسحر والعفاريت". كما استخدم "تويتر"، أيضا في التعليق على مباراة، أمس، قائلا: "لعبنا أسوأ مبارياتنا منذ شهور ومحدش يقولي ده شمهوريش ولا عمل على رجل نملة".