نشوى مصطفى تعلق على ارتفاع الأسعار: «الست المصرية بتمشي بيتها بأقل فلوس»

علّقت الفنانة نشوى مصطفى على ارتفاع الأسعار في الأسواق من خلال حسابها بموقع التواصل الاجتماعي فيسبوك، اليوم الثلاثاء، قائلة: "استحمل الجوع، لكن مااستحملش الذل بعيد عن مصر ".
وأضافت: "ليه باقول الكلام لأن كيلو الفراخ الفيليه اللي فى رمضان كان وصل لسبعين جنيه، النهارده اشتريته باتنين واربعين جنيه، ودعيت ربنا يارب يبقى بعشرين علشان الغلابة، الست المصرية تعرف تحبأ وتدبأ ( ماعرفش المعنى الحرفى لكن بالشبه كده تعرف تمشى بيتها بأقل فلوس ) الست المصرية تعرف تستر بيتها".
تابعت قائلة: "وانا استحمل الجوع لكن مااستحملش انى مايبقاش ليا وطن، وللعلم انا زوجى مصرى يحمل الجنسية الامريكية، ورفضنا نسيب بلدنا ونروح نعيش فى امريكا، الوطن غالى، ربنا يعز كل اخواتنا العرب اللى خربوا بلدهم وهجروهم منها وعايشين بعيد عن اوطانهم".
واستطردت: "بالمناسبة انا ولله الحمد ساكنة فى منطقة تصنيفها منطقة راقية، سيدات الحى اللي ساكنة فيها عرفونى اماكن بيع حاجات للبيت بارخص الاسعار ومضمونة لانها من منافذ الجيش، اللحمة بستين جنيه والمفروم بتسعه وتلاتين، كرتونة المياه باربعه وعشرين جنيه وبره بسته وتلاتين، الزيت والرز والمكرونه والزيتون والمربى، فرق الاسعر ارخص من بره بنسبه اربعين فى المية، نساعد بعض احنا فى شدة بس والله شده وحتزول، تحيا مصر حرة".