أهالي الدقهلية يستغيثون: «فاتورة» مياه الشرب وصلت 300 جنيه

اشتكى عدد من أهالي محافظة الدقهلية، ارتفاع قيمة فواتير مياه الشرب، مطالبين محافظ الدقهلية، حسام الدين إمام، بالتدخل في الأمر، ومعرفة السبب الحقيقي وراء الارتفاع الجنوني للفاتورة، حيث وصلت في بعض الأحيان إلي 300 جنية، بدلاً من 30 جنية قيمة فاتورة الشهر الماضي.
يقول مصطفي السطوحي، أحد أهالي شربين، المياه بتقطع بال 12 ساعة، وفي الأخر أجد فاتورة الشهر 220 جنية، بعد ما كنت بدفع 30 جنية فقط، هي شركة مياه الشرب والصرف الصحي بالدقهلية، محتاجه الناس تطلع تقطع الطريق وتولع في البلد، الناس هتدفع منين قيمة الفواتير النار دي، مطالباً الرئيس عبدالفتاح السيسي، بالنظر إلي معاناة أهالي الدقهلية، ورفع الظلم الواقع عليهم من شركة المياه، وتخفيض الفواتير.
"لو ماء زمزم مش هندفع كده"، بهذه الكلمات بدأ محمود حمدي، أحد أهالي دكرنس، حديثه قائلاً :"الفاتورة الشهر ده 287 جنيه، لشقة واحدة، والاستهلاك ضعيف جداً، أكيد دي فاتورة مغسلة السيارات اللي بتسرق المياه من الشوراع عيني عينك، من غير عدادات، وطبعاً مفيش حد بيقرب منهم علشان الدفع والرشاوي شغاله، لكن المواطن الغلبان يدفن وهو عايش"، مشيراً :"بفكر ألغي عداد المياه وأشرب من مياه الترع الملوثة أفضل".
وقال محمد عزب، أحد الأهالي، "فاتورة المياه الشهر ده 310 جنيه، وعندما سألت المحصل سبب ارتفاع قيمة الفاتورة، أكد أن سعر المياه ارتفع، للحفاظ على المياه"، مضيفاً :"في الأخر بيقولك أن الحكومة مقدمة خطه لمجلس النواب تتضمنها عدم المساس بمحدودي الدخل، اللي أصبحوا أساسا معدومي الدخل والفساد أصبح عيني عينك والواحد مش عارف البلد بتتقدم ولا بتتأخر".
يقول محمد عبدالرازق، أحد الأهالي، "على فكرة لما فاتورة المياه ارتفعت، ذهبت إلى شبكة المياه وجبت قراءة العداد اللي عندي والقراءة في الفاتورة، واكتشفت إن هما بيسجلوا أي قراءة وخلاص وعملت شكوى وروحت للمدير في شبكة المياه ودفعت يوميها ٦جنيه بس، والسبب أنه ليس هناك موظفين كفاية لقراءة العدادات".
ومن جانبه، أكد حسام الدين إمام، محافظ الدقهلية، أنه طالب المهندس عزت الصياد، رئيس شركة مياه الشرب والصرف الصحي بالدقهلية، اليوم الأربعاء، إعداد تقرير وعرض الموقف التفصيلي لأسباب ارتفاع فواتير المياه في شتي أنحاء المحافظة.