احمد عفيفي يكتب: جمهورية مرسي .. «استك منه فيه» !!

قسما يآيات الله كنت عارف انه حيعملها .. بس مش بالسرعة دي .. قرار يطلع بالليل بأمر رئاسي ويتلغي الصبح بأمر رئاسي برضه .. انا قلت أكيد حيلغيه يوم الخميس اللي جي قبل الاستفتاء بيومين ، لكنه عملها ولغاه النهارده الصبح .. لانه ببساطة شديدة أصدره عشان يلغيه .. بالضبط زي سعيد صالح في «هالو شلبي» وشرابه المشهور الاستك منه فيه .. اشده يلسعني .. اشده يلسعني .. طيب بتشده ليه يامحفوظ ؟ .. عشان يلسعني!
بتكلم عن قرار السيد رئيس جماعة الإخوان المسلمين بزيادة الضرائب على السلع اللي اخد مساحة كبيرة من برامج التوك شو امبارح .. وكتير مستغرب .. معقولة .. هى ناقصة قرف .. هو عايز يراضي الناس ولا يستعديهم .. وانا قاعد اتفرج مع ابني الدكتور الصيدلي .. ولقيته بيسألني : معقولة هو مفيش مخ بتلاتة تعريفة .. هو ده وقته؟ .. فضحكت وقلت له: بكره حيلغيه .. فرد : امال بيطلعه ليه؟ .. فقلت: عشان يلغيه ويثبت لنا انه الأب الحنون اللي ميرضاش لشعبه المعاناة، من منطلق قناعته الشديدة بأن اللي فينا مكفينا، وتعالوا نقرا البيان الرئاسي نصا: السيد رئيس الجمهوريه وهو يستشعر نبض الشارع المصري ويدرك مدي ما يتحمله المواطن المصري المكافح من أعباء في هذه المرحلة الاقتصاديه الصعبه، قد تابع ما ترتب على إصدار قرارات تتضمن رفع الضرائب على بعض السلع والخدمات من ردود فعل ناشئة عن التخوف من أن يؤدي تطبيق هذه القرارات إلى إرتفاع في الأسعار وزيادة تكاليف المعيشة على المواطنين ولما كان السيد الرئيس لا يقبل أن يتحمل المواطن المصري أي عبئ إضافي إلا باختياره ورضاه فقد قرر سيادته وقف سريان هذه القرارات وكلف الحكومة بأن تجري حولها نقاش مجتمعي علنيا يتولاه الخبراء المتخصصون حتى يتضح مدي تمتعه بقبول الرأي العام، وسيبقى الشعب دائما هو صاحب الصوت الأعلى والقرار الاخير.
خلص البيان .. في اقل من 24 ساعة أدرك سي مرسي أن الشعب مش ناقص معاناة، ولو تمثلت هذه المعاناة في سيجارة ينفخ فيها واحد غلبان غيظه وهمومه مما يحدث له ولبلده في ظل حكومة قنديل اللي كأنها مش ساكنة معانا في نفس البيت.. كأن جالها عقد في الخليج وصعبان عليها تسيب الهيلمان الرئاسي لغيرها .. فراحت تباشر أعمالها من هناك .. يعني لا رحمت ولا سابت رحمة ربنا تنزل.

ارجع للبيان الرئاسي الاستك منه فيه واقول ما توقعته حدث .. مش لأني «فهّامة» وواد فكيك .. لكن لأني عارف مدى التخبط والخوف والرعب اللي حصل للإخوان ولمرسي شخصيا من الناس اللي في الشارع .. اللي مش بتوعه .. اللي مش بيتحركوا بالإشارة .. اللي مش بيهمهم مرسي ولا غيره .. الناس الجدعان بجد .. ستات ورجالة اللي يقدروا يشيلوا مرسي زي ماجابوه.
ياجماعة الخير .. والله والله والله .. ده لا يمكن يبقى رئيس جمهورية .. ده رئيس عصابة .. بس دايما رئيس العصابة في الأفلام بيبقى ذكي .. على الأقل بيفضل طول الفيلم هو اللي بيفرض قانونه بالقوة ، بس في الأخر لازم يقع والناس تجيب مناخيره الأرض .. وبمناسبة رئيس عصابة .. انا شفت حكايات المتظاهرين اللي انضربوا لمّا اتعدموا العافية من شوية كلاب ولاد كلب .. عصبجية بلطجية .. اللي هما أفراد عصابة مرسي .. ولفت نظري حاجة «جنّنتني» .. ازاى ولاد الكلب دول .. «على فكرة .. سامحوني معنديش الفاظ اوسخ من كده عشان اقولها وتعبر عن غيظي وكراهيتي وبغضي العنيف مما فعلوه» .. بقول ازاى يقبضوا على الناس ويعملوا لهم محاضر بعد ما يمسحوا بكرامة اللي خلفوهم الأرض .. والشرطة لا تحاسبهم كأنهم بيعملوا حاجة صح او كأنهم مفوضين منها للقبض على الناس وسحلهم وانتزاع اعترافات منهم .. ازاى، حد يفهمني والا حتجنن، يسمحوا ليهم وتحت اى بند في القانون ان شوية رعاع جزم قديمة تبهدل عيالنا وبناتنا بالشكل ده؟
انا سمعت الدبلوماسي السابق في سفارة فنزويلا وهو بيوصف اللي حصل له بعد ماربطوه من ايده ورجله على باب الاتحادية ومرسي جوه .. اى والله العظيم جوه .. وواحدة طبيبة من الإخوان في الرايحة والجاية تديله شلوت وتسبّه بأقبح الألفاظ حتى ان عميد من الحرس الجمهوري رأها تفعل ذلك فساءه ما رأى .. لكن بدلا من يضربها بالجزمة، طلب منها ان تتعامل مع المصاب بإنسانية .. يا حنيّن .. نفسي اشوف العميد ده واسأله : هو ده .. كل اللي انت قدرت عليه .. معنى كده انك عندك أوامر من الريس مرسي نفسه انكم تسيبوا عصابته يعملوا اللي هما عايزينه في المتظاهرين .. لأ .. والمضحك انهم يضربوك ويسيحوا دمك وهما بيقولوا لك .. متقلقش .. احنا عندنا رحمة .. نكسر عضمك ونضربك بالرصاص والخرطوش وبعدين معانا دكاترة مننا تعالجك .. فمفيش مشكلة .. استحمل على أد ما تقدر والدكتور جوه ح «يتف» عليك ويحط لك ع الجرح «ميكركروم»!
هما دول يا عم مرسي رجالتك اللي انت مسنود عليهم «قوة عزيمة ايمان .. رجالة مرسي في كل مكان» .. دول رجالة؟ .. أمال «الشراميط» يبقوا ايه .. انا اسف أوي في اللفظ .. بس مش لاقي أوسخ منه!!
المسألة بايظة ع الاخر .. ولو قدّر الله وحكمنا مرسي 4 سنين .. واضح كده انهم حيبقوا بمعدل 40 سنة من السواد والقرف اللي ممكن نشوفه خلال مدة رئاسته .. لكن مفيش حاجة بعيد عن ربنا .. بس احنا نسعي ونعمل اللي علينا .. والعين بالعين والسن بالسن والبادي اظلم .. وحقنا حناخده حناخده .. وافضل انت ياريس مرسي في الاستك بتاعك .. اشده يلسعني .. ومش حتبطل تشده عشان يلسعك .. بس اللسعة الجاية حتخليك تكره اليوم اللي لبست فيه شراب استك منه فيه !!