حوار صريح جدا جدا!

عبد الرحمن.. شاب واعد يبلغ 20 عاما، ويدرس الإعلام بإحدى الجامعات الخاصة. انضم إلى (أولتراس أهلاوى) منذ خمس سنوات، وكان شاهد عيان على مذبحة ملعب بورسعيد. صداقتى الحميمة مع والده شجعته على الوثوق بشخصى وإجراء حوار صريح جدا جدا عن تجربته مع هذه الرابطة. سأنقل إليكم نص كلماته وسأترك لفطنتكم قراءة ما بين السطور:
■ كيف انضممت إلى الأولتراس وما الشروط الواجب توافرها فى العضو الجديد؟
- ولا شروط ولا حاجة.. مطلوب بس إنك تكون بتحب الأهلى ومستعد تعمل أى حاجة علشانه. أنا كنت بأروح الماتشات وبأقعد وسطهم، وبعدين بقيت أحضر اجتماعاتهم اللى بتتعمل فى الجراج اللى خلف بانوراما أكتوبر، وبكده اعتبرونى واحدًا منهم.
■ ما فلسفتكم فى التشجيع ولماذا تعطون ظهوركم للملعب فى أثناء المباريات؟
- التشجيع معناه أننا نعمل كل اللى نقدر عليه علشان نحمس اللعيبة. مش مهم نتفرج على الماتش المهم إننا نقوم بدورنا فى الوقوف ورا الفريق علشان يكسب دايما.
■ هل تدفعون أموالا للاشتراك فى الرابطة أو لمساعدتها فى توفير الأدوات المستخدمة فى التشجيع؟
- لا أبدًا مش بندفع أى حاجة.. إحنا بس بنشترى تيشيرت الأولتراس، وشوية حاجات صغيرة بيبيعوها علشان يقدروا يجيبوا اللافتات القماش والألوان والحاجات المطلوبة.
■ ما الشكل التنظيمى للرابطة، وكيف يتم التنسيق بين القيادات لإيصال التنبيهات إلى كل الأعضاء؟
- إحنا بنتقسم إلى مجموعات (سكاشن) تبعا للمنطقة السكنية، كل سيكشن بيكون له قائد (الأكتف)، ودول بيكونوا على اتصال مباشر مع الكابوهات -جمع كابو- اللى بيقودوا الجماهير فى المدرجات، ويبتكروا الدخلات فى المباريات. التعليمات ومواعيد الاجتماعات بتوصلنا عن طريق صفحة أولتراس أهلاوى فى «فيسبوك»، بس فيه حاجات مهمة (سيكريت) بتتقال للناس الثقة بس، ودول بيشوفوها على صفحة تانية ب«باسورد خاص!».
■ ما متوسط أعمار الأعضاء؟ وماذا تعرف عن الكابوهات ووظائفهم؟
- نحو 80% من الأعضاء أعمارهم تتراوح ما بين 15 و20 سنة، بس فيه كمان ناس أكبر وناس أصغر. الكابوهات عددهم نحو سبعة أو ثمانية، فيهم واحد فاتح قهوة والتانى فاتح سايبر!
■ هل كنتم تتلقون دعمًا ماديًّا من إدارة الأهلى أو تدفعون ثمن تذاكر دخول المباريات؟
- إحنا ماكناش بناخد حاجة بس سمعنا أن الكابوهات كانوا بيسافروا ببلاش، وواحد من مجلس الإدارة كان بيديهم مساعدات علشان التشجيع. الماتشات اللى الأهلى بينظمها كنا بندخل ببلاش.
■ ما سبب توتر علاقتكم بالأمن والدخول فى مصادمات معه؟
- الأمن هوه اللى بيستفزنا ويفتشنا جامد وإحنا داخلين وياخد مننا الأعلام. أصلا مش مفروض يكونوا فى الملاعب وإحنا نقدر نأمن المباريات بمعرفتنا.
■ هل تأمن على أختك أو والدتك أن تحضر مباراة وسط جماهير الأولتراس؟
- بصراحة لأ.
■ لماذا تركت الرابطة رغم أنك مستمر فى تشجيع الأهلى بجنون؟
- لأن الرابطة ماتت ومابقاش فيها روح!
■ ما رأيك فى هزيمة منتخب مصر أمام تونس والسنغال؟
- بصراحة المنتخب مايفرقش معايا كتير.. المهم فرقتى!