أم البرد اللى احنا فيه!

عزيزى البرد.. ما الذى تفعله بنا ونحن الذين كنا ننتظرك حتى نجرى تحت المطر ونشرب حمص الشام؟ إنت نسيت نفسك يا برد؟ ده إنت كنت صهد ياض ولما بتيجى كنا بنعرق منك ونخش نستحمى. نسيت نفسك؟ إحنا اللى صدّقناك لما كنت نسمة عصارى وكلك ذوق زى اللواء محسن الفنجرى وهو بيأدى التحية للشهداء، تقوم تعمل زيه وتقلب فى فسوة علينا؟! يا برد يا اللى كانت كوفية واحدة بس، هه، كوفية واحدة بس كانت بتخلص عليك، ترجعنا تانى للبس الكالسونات الصوف يا ابن الصقعانة؟ موعدنا 25 يناير أيها البرد... سؤال للمجلس العسكرى: هو مخطط إشعال البلد فى 25 يناير اللى جاى هيدفينا، ولا البرد هيعمل عبيط برضه؟ أعتقد أن الثورة القادمة لن يوزعوا فيها كنتاكى.. على العكس.. أبسليوتلى.. هيوزعوا شوربة عدس. بالنسبة للشرطة العسكرية والأمن المركزى وبخصوص 25 يناير القادم.. مافيش مانع تستخدموا القنابل المسيلة للدموع. الرصاص الحى ماشى.. المطاطى مافيش مشكلة.. إنما ترشوا علينا مية فى الجو ده مش هيحصل لكم طيب.. وقد أعذر من أنذر. محتاجين أوبشن الإشعال الذاتى ينزل مع أى مصرى يتولد.. كل امَّا يبرد يولَّع. بالنسبة للدكتور ممدوح حمزة الذى كان يوزع البطاطين على الميدان.. انسى حوار البطاطين ده خالص السنة دى.