ماذا تعرف عن مرشح الحزب الوطنى ايها المواطن

قريبى المواطن هل تعلم ان مرشح الحزب الوطنى يتميز عن اى مواطن عادى بأن صوته من انكر الاصوات ,لذلك تسمع صوته كنهيق الحمير لما تتوتر
اما من حيث الموضوع فهو وسط ما بين الحمار والحصان اخذ من الحمار غبائه ومن الحصان سرعته ,فسرعته التزويريه 280 صوت فى الساعة ,اما من ناحية الخلق فاخلاقه كثيرا ما توقف عندها ابليس متسائلا ومحتارا و بيضرب كفا بكف وبيقول حرام اللى بيحصل ده ,اما بقى لو ركزنا فى مستوى المعيشة والفروق بينه وبين المواطن العادى فتلاقى المرشح يحيا حياة الكلب اليورك شاير الذى يملكه ثرى غربى مجبش عيال وبيموت موت فى الحيوانات و مدلع كلبه اخر دلع وكتير بيكتبله املاكه بعد الموت ,بالنسبه بقى للهيئه فهو دائما مايحاول التشبه بموظفى منظمة حقوق الانسان ليل ونهار يتكلم عن حقوق الانسان المواطن والنهضه التى يطمح فى ان يساهم فيها من اجلك انت يا قريبى المواطن الانسان و كفاية عليه الاجر والثواب ومن ناحية الاجر فبياخد كتير لكن الثواب بيسيبه لينا وكفاية عليه الاجر والكلام , ودايما تلاقيه يا حبة عين مامته متعصب على طول وبيتكلم بالعين والحاجب من كتر حرقة قلبه على مصلحة اطيانه وممتلكاته عفوا قريبى المواطن فاطيانه غلطة كتابية مقصودة منى,فالمرشح قلبه بيبقى محروق على مصر طبعا احنا اللى نيتنا وحشة , ده صاحب الفكر الجديد وعايش شمعه تحترق من اجلى انا و قرايبى المواطنين ,ومن اهم ما يميز المرشح انه يمتاز بروح الدعابة دمه خفيف المضروب , يعنى مره تلاقى واحد بيقولك انتخبنى علشان مستقبل افضل لولادك ومره انتخبنى علشان انا اللى بشوفلك مصلحتك وكتير بقى انتخبنى من اجل ان اكمل مشاريع الاصلاح ,واخر ما يجب ان تعرفه عن مرشح الحزب الوطنى ان شعاره غمض عينك تاكل ملبن فتح عينك تاخد شبشب.قريبى المواطن مرفق بالنوت صورة توضيحية لشكل مرشح الحزب الوطنى للتعريف به
نوت بتاريخ نوفمبر 2010 كان بمناسبة الانتخابات البرلمانيه وهدفها كان التحذير من مرشحى الحزب الوطنى وفى 2011 بعد الثورة لسه مرشحى الوطنى موجودين ووجب اعادة النشر للتعريف بهم لأن مش مأثر فيهم أى ثورة , بالعكس يا مواطنين بدل ما كانوا ملمومين فى حزب واحد , اللهم صلى على النبى اسسوا تسعة فى عين الشعب والثورة