أخبار تجيب الضغط والسكر

الخبر الاول حملة «جمال مبارك» تستخدم أغنية «يا جمال يا حبيب الملايين» فى الدعاية لترشحه للرئاسة
الخبر التانى مبارك يطالب المواطنين بالمشاركة فى انتخابات «الشعب» والتدقيق فى اختيار المرشحين
وتعليقى على الخبرين دول السح الدح امبو ادى الواد لابوه
بالنسبة لحبيب الملايين الخبر موضحش هل هو حبيب الملايين من الجنيهات ام حبيب الملايين من افراد شعب جزر القمر ولو على الاغانى فانا احب اغنيله يا حلو بانت لبتك اول ما دابت قشرتك
مش السيد جمال دايما بيؤكد انه لن يترشح فى انتخابات الرئاسة طيب لازمتها ايه الدعاية والتكلفة ولو ابو بلاش كتر منه,,الخبر التانى الرئيس بيطالبنا بالمشاركة فى انتخابات مجلس الشعب والتدقيق فى اختيار المرشحين هموت واعرف اضحك على الكلام ضحكة الراقصات فى الافلام العربى بس مبعرفش اعتبرونى ضحكتها واجبروا بخاطرى استاهل جبر الخواطر بعد كلام السيد الرئيس الخيالى يا سيدى الرئيس هو دايما العيب عندنا ومعديك احنا اللى عندنا سوء اختيار ولا ندقق ولا نتفحص ولا نتمحص عند اختيار مرشحينا على اعتبار ان الانتخابات لا تزور والست نزيهة اكله شاربه نايمه فى اللجان ولا بينتخبوا بدلنا ولا اللتهيؤات ديه يا ريس الناس بتدقق والنتيجه بتحسم حسب اهواء ساعدتك وقيادات الحزب ودايرة الباجور تشهد نختار دكتور محمد كامل استاذ القانون الدولى وندقق فى الاختيار نلاقى كيمو كمال الشاذلى نجح بتليفون بعد ما بيكون سقط بالثلث ومره يطلع المسدس ويهدد مدير الامن ومرة يشتم المستشار وتليفون سيادتك الفيصل النهائى اللى بينجح بيه ومع ذلك اوعدك هنصح الشعب يعمل عملية ليزيك علشان يدقق بضمير وحضرتك تزور بضمير الضمير
الخبر التالت مبارك يتدخل لاحتواء الأزمة بين حسن يونس وسامح فهمى.. ويطالب بحلول سريعة للحد من انقطاع الكهرباء
من يوم ما عينى فتحت على الدنيا والشهادة لله الريس بيطالب بحلول سريعه بس نقول ايه المواصلات صعبه والحلول السريعه دايما متعطلة تعطيل بسيط تلاتين سنه فقط لا غير بندور على حلول سريعة كده و تكون سريعة بالنسبه للبطيئه معنديش فكرة بيطبقوها فى دولة ايه
والريس بحكمته المعهودة احتوى الازمة عيب يا وزراء العبوا مع بعض متتخانقوش انتوا كبرتوا عيب الريس يوجهكوا و كل مره بيحتوى الازمه ان كان بالداخل ولا الخارج كما عودنا دائما البلد كلها ماشية بتوجيهات السيد الرئيس حتى العجل فى بطن الست الجاموسة والدته مبينزلش الدنيا الا لما يطمن ان والدته بتتحرك فى الغيط بتوجيهات من السيد الرئيس