مرتضى منصور يرفض طاقم الحكام المجرى للقاء الأهلي

شنّ مرتضى منصور، رئيس نادى الزمالك، هجوماً عنيفاً على جمال الغندور، رئيس لجنة الحكام، بعد أن قام الأخير باختيار طاقم حكام مجرى من الدرجة الثانية لإدارة قمة نهائى كأس مصر بين الأهلي والزمالك المحدد له الاثنين المقبل على استاد برج العرب.

وأكد مرتضى منصور، خلال تصريحاته لبرنامج "الملاعب اليوم"، أن جمال الغندور تعمد اختيار طاقم حكام من الدرجة الثانية لإفساد اللقاء، والتأكيد على جدارة الحكام المصريين، مؤكداً أن نهائى كأس مصر سيكون المباراة الأخيرة لجمال الغندور فى رئاسة لجنة الحكام، وأنه موافق على إسناد اللقاء لحكام مصريين، أو التكفل بسداد قيمة طاقم حكام أجنبى سوبر.

وتابع مرتضى: "الحمد لله إن مباراة الكأس الأخيرة لجمال الغندور فى رئاسة لجنة الحكام، وللأسف أنا اللى جبتك، وكنت واخد عنك فكرة لكن للأسف طلعت غلط، وعايز أقوله إن الكلام اللى عمال تقوله ده يتقال فى غرف النوم وليس فى القنوات المحترمة، ولو عندك حاجة عايز تقولها خليك راجل وقولها.. ولغة التعالى اللى عمال تتكلم بيها وتقول بخاطب الاتحاد وليس الأندية دى ماتنفعش لأن طرفى المباراة أندية كبيرة ولازم تاخد رأيهم".

وأضاف مرتضى منصور: "من امبارح عمال يقول ويمهد إنه هيجيب حكم ضعيف، وهو قاصد علشان لما تحدث كارثة يقولك الحكام المصريين أهم.. ومجر إيه دى اللى يجيبلى منها حكام، أنا مش رايح أشترى قطر علشان أروح للمجر.. وأنا معترض على 3 حكام مصريين، والأهلي ممكن يكون معترض على 2 يبقى 5 من بين 300 حكم محترم آخر، ومعنديش مشكلة إن حد منهم يدير اللقاء مش تجبلى حكم درجة ثانية من وكالة البلح يدير قمة كبرى مثل هذه".

وأردف مرتضى: "جمال الغندور قال إن الحكام الأجانب مش عاجبهم 2000 دولار، وأنا بقوله أنا مستعد أتكفل بقيمة طاقم حكام سوبر، ومش هقول الأهلي يدفع معايا لكن ميجبليش حكام درجة ثانية، لأن الفيلم الهندى ده مش هينفع معايا، أنا من تربية روض الفرج وعارف أنت بتعمل إيه وبتلمح لإيه".

واختارت لجنة الحكام برئاسة جمال الغندور طاقم حكام مجرى بقيادة ساندور ندو، ويعاونه بيتر بيرتيان ودولتفارجا لإدارة مباراة الأهلي والزمالك، المقرر لها بعد غد، الاثنين، فى نهائى كأس مصر. ومن المقرر أن تقام مباراة نهائى كأس مصر بين الأهلي والزمالك فى الثامنة والنصف مساء الاثنين باستاد برج العرب.