كلهم أبرياء

أتعجب ممن يلقون التهم جزافا فى مذبحة بورسعيد فكيف لكم اتهام الاعلام الرياضى وهو لم يقم سوى بالتحريض على التعصب طبقا لانتماء مقدمى البرامج والساده الصحفيين كيف تتهمونهم بدون دليل واحد

هل تعتبر حادثة الجزائر دليلا هل تسليط الاضواء على قلة من مأجورى المدرجات وخلق التنافس الغير شريف بين الجماهير دليلا هل تصيد أخطاء التحكيم وتوجيهها طبقا للمزاج دليلا هل أن تصبح مديرا فنيا مشروطة بالحصول على شهادات متدرجة بينما تصبح مهنة الاعلام مهنة لا مهنة له دليلا هل أن تفرد لك الساعات على الشاشة لتدلع نفسك دليلا هل أن تجتمع لجان النقاد الرياضيين وتشجب وتقاطع وترفع القضايا ضد شخص بينما تلتزم الصمت ضد القتل والاهانة من الجميع حتى تحت قبة البرلمان دليلا هل تسليط الاضواء واستعداء اللاعبين على مدربهم ان تم تغييره أكثر من مره قبل نهاية المباراة وعندما ينتقلون الى ناديك المفضل فلا يلعب سوى آخر ربع ساعة من كل مباراة فلا ترى ولا تسمع ولاتتكلم هل هذا دليلا هل أن يصل بهم الكذب على الموتى أمثال صالح سليم وثابت البطل واختلاق القصص وتزييف التاريخ دليلا هل أن يصل التدنى فى الكتابة فى النقد أن تترك الملعب وتتحدث عن أقنعة أو كفتة أو كلب أبيض أو أعراض هل هذا دليلا
والله ويحكم كيف تتهمون اعلامنا الرياضى

ثم تتبجحون فتتهمون اتحاد الكرة ... ياسلام .... لمجرد أنه اتحاد مجاملات وبيزنس ياخذ العقوبات ويتراجع يلم الفلوس ولا يعيدها يجتمعون فى البيوت وعلى المقاهى وعبر التليفونات يمنع الهبوط لمجاملة مقدم برامج ويهب حصريات المنتخب لمقدم آخر ويمنح المعلومات للثالث ..يحشر مناخيره فى حقوق غيره ويبلطج على اللى عنده فيخصم منه واحده واحده ولما يقولولوه ادفع للاعبين من اللى عندك يقولهم دى حاجه ودى حاجه ... انك تبقى فاضى بس عشان تظبط التظابيط لجمعيتك العمومية وتأبجهم المعلوم قبل كل اجتماع عايز تعمله وتلف عليهم بالتليفونات قبل كل اجتماع مش عايزه يتعمل ... انك مش عارف تعمل لايحة كل السنين دى يوافق عليها الفيفا عادى ... وانك تنظم مسابقة تتلعب كل ثلاثة ايام شوية وتوقفها بالاربعين يوم شوية عادى ان حكامك يتبهدلوا داخليا وخارجيا عادى .... انك تبيع حاجات مش بتاعتك عادى ... انك كل فسوه صغيرة تبعت تاخد راى الفيفا عادى .... انك تلعب فى دور واحد بلعيبة منافسيك عشان فترات القيد اللى فتيت فيها برده عادى . ولا نكتة شمروخ ولا شمروخان ولا ثلاثة شماريخ ثم بدون جمهور آه ثم بدون جمهور لا ... الداخلية قالت آه بس مدير الامن قال لا مهو كله عادى... انك ...انك.... انك .....ولا بالاش اصل الضرب فى الميت حرام ....بزمتكوا بعد كل ده تتهموه ان ليه دور فى المذبحة ياخوانا اتقوا الله شوية

وشوف بقى الافترى بتاع الخلق يقولك أمن بورسعيد .... يانهار اسود يا جدعان هى الناس دى فتحت بقها حتى ولا اتحركوا ولا قالوا حتى عيب ياولاد ابعدوا عن جمهور الاهلى ولا حتى قفلوا عليهم البيبان ولا طفوا عليهم النور ولا معرفوش يدخلوا الاسعاف ....بطلوا افترا بقى

ولا أحلى نكتة بتاعة اتهام النادى المصرى دى ... هو مفيش نظر هو الجهاز الفنى كل حاجه تلزقوها فيه ازا كان لبنان ولا الجزائر ولاتونس ولا حتى قطر بتاعة التجنيس ده انتوا غريبين غرابه .ده حتى لعيبة المصرى انتوا عايزينهم يدافعوا عن زمايلهم بالعافية .. ولا جمهور المصرى آه يا خونة حتى البواسل مرحمتهمش هو محدش فيكوا شاف البدرى فرغلى ولا أكرم الشاعر وهم بيحلفوا ان البورسعيدية بق بس وميعرفوش يشيلوا شومة

وحتى الراجل الغلبان فهيم عمر مسلمش من لسانكم قال ايه عايزينه يلغى الماتش عشان شوية صواريخ وشماريخ وترت بالزمة ده كلام ما الراجل عمل اللى عليه ده حتى الطوب خباه وحسام غالى المفترى منه لله كان عايز يبوظ الماتش وبيشتكى قاله طب بالسلامة ياحبيبى .. وعماد متعب ده كمان قال ايه مش عارف يسخن واضرب طب منتش نازل انت كمان.

طب على راى الحاج محمود بكر واحد يجى يسألنى لما كل دول براءة ايه بقى اللى حصل ... أنا أقوله بصراحة جمهور الاهلى واضح انه مستحملش انه يتغلب فى الماتش راحوا منتحرين علطول .
حسبى الله ونعم الوكيل