الحاج حسني بهدل المخابرات الأمريكية!

يوميات مواطن مفروس

اصدرت المخابرات الامريكية 117 تقريرا نفسيا عن الحاج حسني الذي يرقد الآن في منتجع شرم الشيخ وكل شوية يقولهم: أنا عاوز هيفاء وهبي تغنيلي بوس الواوا آح.. خلي الواوا تصح، ثم يقطع النفس أول ما يشوف الحاجة أم جمال، وهذه التقارير كلها كانت أيام فترة حكمه السودة علينا وعلي دماغنا البعيد، وتؤكد أنه بليد الفهم ويعشق الكذب والنميمة.
وأن المخابرات الأمريكية.. كانت بتضحك علي سيادته، وتقوله تعالي نفرجك علي أفلام مناظر وآخر مسخرة في البيت الأبيض، ويقعدوا في الضلمة يراقبوه زي المخبرين، عشان قال إيه يعني.. ياخدوه علي خوانة، لكن سيادته بسم الله ما شاء الله.. قاعد ولا الشاويش عطية في زمانه لحد ما بهدل المخابرات الأمريكية بجلالة قدرها وبقت ماشية تطوح ولا الغازية العامشة، وفي الآخر قالولك.. مافيش فايدة.. الراجل ده لامؤاخذة عنده مرض نفسي صعب قوي، ويجعله مستعدا لقتل كل من يهدد ذاته واحنا عندنا ولاد عاوزين نربيها.. وطبعا المخابرات الامريكية فاكرة أنها اكتشفت سر الارض بتاع القرموطي، أو اكتشفت أن الست تلد، بينما الرجل يبيض علي رأي الفيلسوف العربي الكبير، والمناضل الصحراوي، معمر القذافي، وعلي فكرة مش أخو الطريق الصحراوي ده مجرد تشابه أسماء لكن الحقيقة المرة.. أن خيبة المخابرات الامريكية ماوردتش علي حد فقد اضاعوا وقتهم وصرفوا اللي وراهم واللي قدامهم وقعدوا يراقبوا سيادته ولاحرامية الغسيل، وفي الآخر طلعوا بالكلام الفارغ ده الذي يعرفه الجميع في بر مصر حتي العيال الصيع اللي بتجري ورا عربيات الرش في الحواري، يعني الحكاية لامحتاجة مصاريف ولا دراسات ولانيلة كفاية تشوف وش سيادته السمح وأحوال المصريين المنهوبين الموكوسين منذ ثلاثين عاما عشان تعرف شخصيته أو تقعد قدام التليفزيون وتتفرج علي زياراته الميدانية التي كان يقدمها التليفزيون بدلا من برنامج ساعة لقلبك مثل تلك الزيارة التي سأل فيها عاملة في أحد المصانع.. عندك عيال؟!
فقالت ثلاثة ياريس، ولأن سيادته علي ما يفهم تكون الدنيا خربت فقد سألها بعد ذلك .. ومتجوزة؟!
وسيبك من الشعب الجبلة اللي قعد يضحك علي سيادته لأنه أولا شعب واطي عاوز يشمت في سيادته، ثانيا لايمتلك البصيرة والحكمة التي يمتلكها يعني ممكن الولية دي تكون جايبة العيال في الحرام مثلا؟! أو عن طريق التلقيح الصناعي، أو سلفاهم من جارتها تشحت بيهم ولأن سيادته يمتلك نظرة مستقبلية فمازال منتظرا أن يخرج الشعب المصري مرة أخري ويهتف ويغني له .. ده أحنا من غيرك ولاحاجة.. وناقصنا كام مليون حاجة.. ياغالي عندنا.. ماتروحش مننا.. واوعي