مواويل من قلب الميدان

قصيدة جديدة لسيد حجاب

ليه التراخي ف محاكمة خاين الأمة
دي ضغوط؟! ومن بره ولا جوه؟! مين هُمة؟!
ولا انت صعبان عليك العشرة والمقامات؟!
دوس ع الضغوط واحنا وياك ندفع الغمة
وليه حكومة شرف مغلولة اليدِين
وفيها وزرا لمبارك مفسدين فاسدين
صبيانه لسه ..وفساده لسه في الإدارات
بيشنوا ثورة مضادة ف كافة الميادين

يا المجلس الأعلي احنا شعبك الأعلي
ولا أعلي منا سوي سبحانه جلّ علاه
ودي معاتبة بْمحبة لاغضبة ولا زعلة
وطاعة الشعب واجبة بعد طاعة الله

يا المجلس الأعلي ..واحنا الأعلي والأوْلي
وانت وكيلنا وبتدير باسمنا الدولة
ودي ثورة شعبية..واحنا وجيشنا إيد واحدة
ودي حاجة واضحة ومش محتاجة لمداولة
والشعب راجع وطالع ع الميدان دَيدَبان
جاي يحمي ثورتنا من أعوان نظام الجبان
ودي ثورة شعبية مية المية سلمية
بتحطم القضبان .. وفاتحة البيبان

الشعب راجع وطالع تاني يحمي الميدان
من الديدان اللي لسه متبِّتة في العيدان
ح نقيم ميزان العدل لجل الجميع
وصاحب الحق ياخده واللي أجرم يدان
طالعين نطالب بحق الثورة والشهداء
من اللي قتلوا شبابنا وكانوا أس الداء
من أول اللي اتخلع لولاده لعصابته
لكل مين خان بلدنا لصالح الأعداء

ازاي تحاكموا اللي قتلوا ع اللي سرقوه بس
مش ع الفساد اللي ساد واندس بينَّا ودس
وبذر بذور فتنة بينا لجل ظُلمُه يسود
وقتل شبابنا وقال إنه عميل مُندس
ليه التراخي ف محاكمة خاين الأمة
دي ضغوط؟! ومن بره ولا جوه؟! مين هُمة؟!
ولا انت صعبان عليك العشرة والمقامات؟!
دوس ع الضغوط واحنا وياك ندفع الغمة

وليه حكومة شرف مغلولة اليدِّين
وفيها وزرا لمبارك مفسدين فاسدين
صبيانه لسه ..وفساده لسه في الإدارات
بيشنوا ثورة مضادة ف كافة الميادين
لابد م الثورة لا مهادنة ولا استسلام
ولا مصالحة مع الداخلية والإعلام
غير لما يتطهروا من كافة الفاسدين
والأمن يرجع ويصنع شعبنا الأحلام

وليه ما فيش حد أدني وأعلي لأجورنا
خدوا م اللي فوق للي تحت..الجوع ح يقبرنا
مش كلنا شركا في بلادنا احنا وولادنا
فين العدالة اللي قُمنا لجلها وثُرْنا
وليه تكيلوا بمكيالين يا اخوانَّنا؟ّ!
بتحاكموا زهرة شبابنا ف محكمة عسكر
وتحاكموا بالراحة أفسدنا وأخونَّا
ده ظلم بين ولازم بابه يتسكَّر
المجلس الأعلي جاي في مهمة وطنية
مش فض عركة ما بين ثورة ..ونظام أغوات
ولا بد من إجراءات ثورية فورية
ومش ح نرجع نحاور بعض في متاهات