اللي احنا بنشوفه ونعيشه ده يخلي العاقل يروح يقعد في مستشفي المجانين أحسن من القعدة مع البني آدمين اللي مش عارفين أو مش فاهمين، تقدروا تقولوا لي إزاي حسن نصر الله دلوقتي بقي عدو زي إسرائيل، أو أكثر من إسرائيل، وبقي التعامل مع حسن نصر الله تهمة وقضية مع أن أغلبية المصريين وأنا منهم بنحب حسن نصر الله وأيدناه في حربه مع إسرائيل وانتصاره عليها، دلوقت بقي نلاقيهم بيقبضواعلي الناس لأنهم يبحبوا حسن نصر الله أو بيتعاملوا معاه. بصراحة حاجة تجنن ومش عارفين، أو مش فاهمين نصدق مين اللي بيقبضوا علي المسلمين ويهللوا ويفرحوا و«يتنقعروا» بأن إسرائيل تحميهم ولا المسلمين زينا اللي طلع منهم واحد بيكره إسرائيل،وكان عند كلمته لما قال: هحاربهم وانتصر عليهم وفعلاً انتصر عليهم. أفتكر زمان في مسلسل «دموع في عيون وقحة» للفنان عادل إمام مشهداً مع الفنان الراحل صلاح قابيل بعد أن خدعوا المخابرات الإسرائيلية وأرسلوا لهم رسالة كان نصها: «من المخابرات المصرية إلي المخابرات الإسرائيلية، نشكرك علي حسن تعاونكم» يا تري الرسالة دي دلوقت مين هايقولها لمين؟!